Меню
16+

Сетевое издание «Будни района»

07.08.2020 09:40 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Эки юбилейин бирче къаршылады

Автор: Нюрсагьадат Изамутдинова

Бир-бир адамлар оьзюню яшав ёллары, яхшы амаллары, иш гьаракаты булан халкъ арада белгили бола, айланадагъыланы сюювюн ва абурун къазанма бажара. Олар оьзлер де юртлуларын, халкъын сююп де, абурлап да биле. Шолай, бизин райондан оьтюп, савлай Дагъыстангъа белгили болгъан адамланы бириси деп, язывчу ва шаир, Къарабудагъгент район газетде 60 йыллагъа ювукъ ишлеген журналист Узлипат Ибрагьимованы гьакъында айтсакъ, дурус болар деп ойлашаман. Къатынгишилени арасында шолай кёп йыллар бир ишде де ишлеп, уьстевюне, шиърулар да язып, китаплар да чыгъаргъан къатынгишилер кёп тюгюл. Узлипат Ибрагьимова буса шоланы барысын да айланадагъылар сукъланардай юрютген. Бизин булан ишлеп, бизге насигьат берип, билмейгенлерибизге уьйретип, бизин, демек, газетни коллективин, оьз агьлюсюндегилер йимик сююп, олардан сююнюп тургъан. Узлипат Ибрагьимова бу йылны апрель айыны 15-нде редакцияда ишлеме башлагъанлы 60 йыл тамамланды. 

Олай да, бу йыл апрель айны 15-нде ол оьзюню 80 йыллыкъ юбилейин де белгиледи.

Узлипат Ибрагьимова 1940-нчы йылны апрель айыны 15-нде бизин районну Къакъашура юртунда сабанчы-фермерни агьлюсюнде тувгъан. 1960-нчы йыл У.Ибрагьимова Къарабудагъгент юртдагъы «Коммунизм учун» деген район газетде адабият къуллукъчу болуп иш башлагъан. Кёп йылланы узагъында газетде ишлеген У.Ибрагьимова культура ва адабият бёлюкню заведующийи, редакторну орунбасары, жаваплы секретары, таржумачы болуп чалышгъан. Район газетде ишлей туруп, ол Дагъыстан пачалыкъ университетни филология факультетини рус-дагъыстан бёлюгюн охуп битдирген.

Къакъашурада тувгъан, Къарабудагъгентде яшавун къургъан ва насибин тапгъан У.Ибрагьимованы гьар юрт оьзюню оьз къызы йимик гьисап этген. Къарабудагъгент юртну халкъы да ону аявлап алгъан, бавуруна басгъан. Оьз ягъындан Къарабудагъгент юртну халкъын Узлипат Ибрагимова да аявлагъан, экинчи ата юртуна йимик янашгъан, халкъын сюйген.

Журналист гьисапда Узлипат Ибрагьимова кёп адамлагъа, айрокъда загьматчылагъа, республикагъа белгили болгъан жамият чалышывчулагъа багъышлангъан кёп маъналы очерклер язгъан. Гьар гюнлюк къыставуллу ишине, агьлюсюне ва яшлагъа берилгенлигинден къайры да, Узлипат Ибрагьимова шаирлик ишге, яратывчулукъгъа, китаплар чыгъарма заман да тапгъан. Инг башлап ону шиърулары ва хабарлары оьз газетинде, сонг республика оьлчевде чыгъагъан «Ёлдаш», «Дагестанская правда», «Ассалам» газетлерде, «Тангчолпан», «Дагъыстанлы къатын», «Къарчыгъа» журналланы бетлеринде чыкъгъан. Ону шиъруларын районну халкъы кёп сююп охуй, шаир булан ёлугъувлар, адабият ахшамлар, лакъырлашывлар оьтгере.

У.Ибрагьимова оьзюню генг маъналы поэмаларында, шиъруларында яшавну тюз кюйде суратлама, охувчугъа етишдирме бажара. Ол оьзюню шиъруларын тувгъан ва оьсген юрту Къакъашурагъа, яшавлукъ къысматын байлагъан, оьзю­гер аявлу болгъан Къарабудагъгент­ге, оланы халкъына, ата-анасына, дос-къардашына, табиатгъа, ватангъа, сюювге, Ватан давну ортакъчыларына багъышлангъан. Оланы охугъан чакъы охумагъа сюесен, маънасы гьар-бир адамгъа да анг­ламагъа рагьат, ювукъ. У.Ибрагьимованы кёп шиъруларына макъамлар салынып йыргъа айлангъан. Ерли ва башгъа районлу йыравлар ону шиъруларына гёре къурулгъан йырланы кёп сююп йырлай, шиърулары саялы разилигин билдире. Оьзюню шиъруларында, хабарларында тюрлю очерклеринде ол яшавлукъ, къы­лыкъ ва тарбия масъалаланы гьакъында кёп яза.

Уллу агьлюсюню тюрлю намусларына, барагъан ишини авурлугъуна да къарамайлы, ялсыз къатынгиши китаплар чыгъарма да заман таба. Гьар йылларда У.Ибрагьимованы «Яшлыкъны сеси», «Гюллерим», «Сёнмейген от», «Шамчыракъ», «Гьасиретмен яшавгъа», «Маккагъа сапар», «Халкъым – мени къанатым», «Тавлар шагьат», «Сокъмакъдан уллу ёлгъа», «Мени дюньям», «Юлдузлу ёллар» деген ва башгъа китаплары басмадан чыкъгъан.

Яратывчулукъ иши булан янаша Узлипат Ибрагьимова 1995-1998-нчи йылларда агьлюсю булан бирче дёрт керен гьаж­гъа барып, гьакъ борчун да кютюп гелген. Гьаждан къайт­гъан сонг, ону «Маккагъа сапар» ва “Юлдузлу ёллар” деген китаплары чыкъ­гъан. Районну халкъындан оьтюп, савлай Дагъыстанда яшайгъанлар шо китапланы кёп сююп къаршылагъан ва охугъан. Дагъыстан язывчуланы ва шаирлени арасында Маккагъа баргъан сапарына багъышлангъан асарлар кёп аз бардыр.

У.Ибрагьимова Россияны язывчуларыны союзуну уьюрю, 1976-нчы йылдан башлап СССР-ни журналист­лерини союзуну да уьюрю, сонг да ол «Дагъыстанны маданиятыны ат къазангъан къуллукъчусу» деген атгъа да тезден берли ес болгъан.

У.Ибрагьимова районну бары да ишлеринде актив кюйде ортакъчылыкъ этип гелген. Бугюнлерде де ол районну школаларда, маданият ожакъларда, клубларда, музейлерде оьт­герилеген ёлугъувлагъа чакъырылып бара, оларда актив кюйде ортакъчы­лыкъ эте. Ону ортакъчылыкъ этивю булан районну юртларында кёп тюрлю адабият ахшамлар оьтгериле.

Гьар ёлугъувда ол яшёрюмлеге, охувчулагъа маъналы насигьатлар бере, къылыкъ якъдан тарбиялай лакъырлашывлар оьтгере. У.Ибрагьимованы сёйлевлерине, шиъруларына жагьиллер кёп сююп ва тергевлю тынглай. Ол яшёрюмлени тарбиялы болмагъа, яхшы охумагъа, ата-бабаларыбыздан къалгъан асил мердешлени сакъламагъа чакъыра.

Район газетде иш башлап кёп заман да гетмейли, Узлипат Ибрагьимова ерли комсомол къурумну секретары, профсоюз комитетни председатели болуп чалышгъан, 18 йыл арт-артындан ерли башлапгъы партия къурумну секретары болуп сайлангъан. У.Ибрагьимова кёп керенлер язывчуланы съездлерине, партконференциялагъа делегат болуп сайлангъан. Сонг да, ол ерли Советге депутат, судгъа заседатель болуп да сайланып тургъан.

Оьзю редакцияда ишлеген йылланы узагъында Узлипат Ибрагьимова мунда ишге гелген нечесе журналистлеге оьзюню кёмегин болдургъан, ишдеги бай сынавун уьйретген, насигьатлар берген, масъалаларына тынглагъан, якълагъан. Не сорав булан ону янына барсакъ да, иши бар буса да, бёлюп-ярып бизин къуллугъубузну кютмеге, билмейгенибизни бизге англатмагъа, уьйре тмеге гьар заман гьазир тургъан. Шо саялы да биз огъар бугюнде де баракалла билдиребиз.

Озокъда, алдын газетде ишлеме гьали

йимик имканлыкълар болмагъан. Демек, газетни бары да ишлери къол гюч булан этиле болгъан. Журналистлеге де иш айрыча авур болгъан. Тек Узлипат Ибрагьимова къыйынлыкълагъа бир заманда да чул бермеген. Ишине де толу кюйде берилип, яратывчулукъ ёлун да ярыкъландырып китаплар да чыгъаргъан, уьюн де юрютген, жамият ишлеге де къуршалгъан. Районну ишчи ва загьматчы халкъларыны къайратлы загьматын, уьстюнлюклерин республика ва район газетлени бетлеринде охувчулагъа малим этип, гёрсетип тургъан.

Район газетде ишлейген адам, журналистлер даим янгылыкълар излемеге, яратмагъа, ойлашмагъа герек. Озокъда, газетде ишлейген адам биле – о рагьат иш тюгюл. Газетде ишлемегенлер журналистни ишин нечик къыйын экенин билмейгени ачыкъ. Узлипат Ибрагьимова буса газетни ишин бек яхшы бажарып юрютген. Охувчулар ону макъалаларын, суратлавларын, шиъруларын, гьар тюрлю поэмаларын, очерклерин, зарисовкаларын кёп сююп охуп, оланы сабурсуз къаравуллап тургъан. Талапгъа гёре У.Ибрагьимова оьзюню къолундан гелеген бары гьаракатны этген, гюндюз ишлеп, гечелер шиърулар язгъан.

Ону намуслу загьматы пачалыкъны да, оьр гьакимиятны къуллукъчуларыны да, жамиятны да янындан яхшы багьалангъан. У.Ибрагьимова кёп йыллар загьматда оьзюн айрыча гёрсетгени саялы «Ватанны алдындагъы къуллукълары учун» деген орденни медалы булан савгъатлангъан. Ону «Загьматны ветераны» деген ва башгъа медаллары да бар.

Узлипат Ибрагьимова Дагъыстан халкъларыны III-нчю съездини делегаты, ДАССР-ни Оьр Советини, Дагъыстан Республиканы Халкъ Жыйыныны, республиканы милли сиясатыны, маълумат къуралларыны ва тыш байлавлукъ министерлигини, районну Халкъ Жыйыныны ва район администрацияны, «Районну яшаву» ва «Ёлдаш» газетлени Гьюрметлев грамоталары булан кёп керенлер савгъатлангъан.

Узлипат Ибрагьимова яхшы журналист ва сююмлю шаирден къайры да, татывлу ожакъны къуванчы, гьайлы ана да дюр. Ол оьзюню аналыкъ борчларын да макътавгъа лайыкълы кюйде кютген. Ону яшлары оьр билимлер алып, яшавда оьз ерлерин тапгъан, тюзевлю агьлюлер къургъан ва насипли яшай. Бугюнлерде У.Ибрагьимова законлу ял алывда, уьйде буса да биз ону булан чакъда-чакъда ёлугъабыз, ягъына барабыз. Ол оьзю де бизин ягъыбызгъа, кёп йыллар ишлеген ерине, редакциягъа гелип гёрюп гете.

Биз, Узлипат Ибрагьимованы иш ёлдашлары, савлай коллективи, газет учун, эли, халкъы учун яралгъан анадашыбыз, сырдашыбыз, иш ёлдашыбыз Узлипат булан оьктем болабыз. Ону эки де юбилейи булан къутлайбыз. Огъар гьакъ юрекден къатты савлукъ, узакъ оьмюр, къайгъысыз яшав ёрайбыз. «Сав болугъуз, бар болугъуз», — деп айтма сюебиз.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

7