Ассоциация къурма таклиф этген

Гетген жума районну башчысы Магьмут Амиралиев районну ябукъ топуракъда овошлар оьсдюрюв булан машгъул далапчыларыны бир группасы булан ёлукъгъан. Ол оьзю­ню сёйлевюнде ябукъ топуракъда овошлар оьсдюрюв булан машгъул болагъан ёлдашлар районну экономикасыны оьсювюне, янгы иш ерлер болдурувда оьз къошумун этегенин ташдыргъан.

Районну башчысы М.Амиралиев районну теплица хозяйстволарына йиберилеген газны лимит масъаласын ёрукълу чечме таклиф этген. Шу масъала яшавгъа чыгъарылса, къоллагъан газгъа гьакъ тёлев 20 процентге тёбенлешме болагъанын англатгъан.

Ёлугъувну барышында район муниципалитетни башчысы сугъарыв сувну масъаласын чечивню, топуракъ участкаланы кагъызларын онгарыв, ондан къайры да овошланы сакълавгъа салагъан логистика центрны масъаласын да гётерген.

Ябукъ топуракъда уллу оьлчевлерде овошлар оьсдюрюв булан машгъул теплица хозяйстволаны ёлбашчылары ёлугъувда оьзлер ёлугъагъан масъалаланы да малим этгенлер. Чинкдеси, берилеген газны сан яны, быргъылардагъы газны басыву (давление), къоллагъан газгъа гьакъны артдырып алагъанын ва оьзге масъалаланы гётергенлер.Районда теплицаларда ишлейгенлени талапларына ва масъалаларына тынглагъан сонг, районну башчысы М. Амиралиев овошчуланы интерес­лерин якъламакъ, тармакъны гележекде оьсювюн болдурмакъ, тувулунагъан гьар тюрлю масъалаланы чечмек, гьукуматны янындан берилеген субсидияланы алмакъ муратда районну теплица къуллукъчуларыны ассоциациясын къурма таклиф этген.

Районну ябукъ топуракъда овошлар оьсдюрюв булан машгъул далапчылары М.Амиралиевни сиптесин бир гёнгюлден якълагъанлар.