Юзюм бавлар…
Бизин район Дагъыстанны чинк де гёзел, адамлагъа яшамакъ, яшав сюрмек учун инг де онгайлы ерлени бири десек, янгылыш болмасбыз. Бизин районубуз – къайсы девюрде де авлакъ ниъматланы мол гелимлери, юртланы айланасындагъы емиш бавлары ёлавчуну сукъланывун гелтирген.
Районубузну тюзлюк зонасындагъы арив къуллукъ этилген юзюм, баъли, кюреге, гьармут, шаптал бавлар федерал сылама ёлдан оьтегенлени тергевюн тартмай къоймай.
Демократия алмашынывланы девюрюнде лап агьамиятлы юрт хозяйствогъа тергев берилмейген вакътилерде оьзге ерлерде йимик, бизин районда да юрт хозяйство производство кютюрлюкге тарыды.
Яшавну бир эниши, бир оьрю дегенлей, гьали гьукуматны башын тутгъанлар юрт хозяйство производствону оьр даражагъа гётермек муратда топуракъда доланма сюегенлеге харжлар, енгил кредитлер булан кёмек этилегенин барыбыз да гёрюп турабыз.
Юрт хозяйство производствону гётермек, юзюм, емиш бавлар орнатма, гьайванчылыкъ булан машгъул болагъанлагъа гьукуматны янындан этилеген кёмеклени фермерлерибиз яхшы сезелер.
Гьукуматны янындан этилеген кёмеклер себеп болуп, гьар йыл районда 100-110 гектаргъа юзюм, 50-60 гектаргъа емиш бавлар орнатыла.
Уллубийавул юрт муниципал къурулувда артдагъы эки йылны ичинде бир тюрлю авурлукълагъа да къарамайлы, юзюмчюлюк тармакъ чалт кюйде оьсе, янгы юзюмлюклер орнатыла.
Юртдагъы «И.В.Умаханов» деген сабанчы- фермер агьлю юзюмчюлюк тармакъны оьсдюрмек учун гёз алгъа уллу планлар тутуп ишлей. 2019-нчу йылны язбашында оьрде эсгерилген сабанчы-фермер агьлю гьукуматны янындан этилеген кёмек харжлагъа аркъатаяп, 41 гектаргъа яш юзюмлюклер орнатгъан.
Август айны 8-нде ДР-ни юрт хозяйство ва ашамлыкъ министерлигини министрыны орунбасары Эмин Шайыхгьасанов бизин районда болгъан. Ол оьрде эсгерилген сабанчы-фермер агьлюню юзюмлюклерини гьалына, этилеген къуллукъланы сан янына тергев этген.
Сабанчы-фермер агьлюню ёлбашчысы Шагьабутдин Умаханов булай деди: -Гьукуматны янындан этилеген кёмеклер мени янгы агьлю далапчылыкъ булан машгъул болма, юзюм оьсдюрме ругьландырды. Юзюмню «Молдова» журасын оьсдюремен. Юзюмлюклеге шпалер орнатылгъан, тамчы къайдада сугъарыв алатлар къурашдырылгъан. Гьали де юзюм борла яш. Тюшюм берме 4-нчю йыл башлажакъ. Фермер Ш. Умаханов оьзюню сёзюн узата туруп, сугъарыв сувну масъаласы барны эсгерди. 5 минг куб сув сыягъан къую этгенмен. Шо къуюдагъы сув къургъакъ йыл борланы оьлме къоймай сакълама кёмек этди. Фермер дагъы да 50 гектаргъа борла орнатма къасты барны, тек топуракъ ёкъну эсгерди.
«Умаханов И.В.» деген сабанчы- фермер агьлюню башчысы оьзлени гьаракаты, къайратлы загьматы булан хозяйствону уьлгюлю даражагъа етишдирме къасты бар.
Министрны орунбасары Э.Шайыхгьасанов оьзюню янындан хозяйствону юзюмлюклерини бары да агротехника къуллукълары сан янлы кютюлгенин, юзюмлюклени гьалы оьр даражада экенин айрыча эсгерди. Ол оьзюню сёйлевюн узата туруп, артдагъы йылларда гьукумат юзюмчюлюк тармакъны гётермек учун уллу оьлчевлерде акъча маялар гёрсете. Масала, ДР-ни минсельхозпродуктну янындан борла орнатма къуллукъ этме, шпалер салма, тамчы къайдада сугъарыв алатлар къурашдырма гетген харжлагъа гесек акъча кёмек этиле. Министерликни касбучулары ерине барып борланы гьалын, этилеген къуллукъланы сан янын тергей, демек, тармакъны оьсювюн, гьукуматны янындан гёрсетилеген харжланы асувлу къоллавну даим тергевню тюбюнде сакълай.
Э.Шайыхгьасанов оьзюню бизин районгъа этген сапарында «Умаханов И.В.» деген сабанчы-фермер агьлюню юзюмлюклерини гьалына, этилген агротехника къуллукълагъа оьр къыймат берген.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
