Районубуз оьсюв ёлда

Сессияны барышында район Жыйыныны депутатлары «Къарабудагъгент район» муниципал районну социал-экономика оьсювюн болдурувда Федерал, республика, муниципал программаланы яшавгъа чыгъыву, район Жыйыныны депутатлары «2020-нчы йылгъа ва планлы 2021-2022-нчи йылгъа къабул этген районну бюджетине къошумлар, алмашынывлар» этив, муниципал районну уставын федерал, регионал законлары талап этеген къалипге гелтирмек учун районну прокуратурасыны «представлениеси» гьакъдагъы масъалалар арагъа салынып ойлашылды.

Биринчи масъалагъа гёре районну башчысыны 1-нчи орунбасары И.Абдулмежитов доклад этди.

Ол оьзюню сёйлевюн федерал, регионал, республика, муниципал программаланы яшавгъа чыгъыву гьакъда айта туруп, 2020-нчы йылда этилип, юрюлюп турагъан ишлерден башлады.

Масала, Губден, Къурбуки юртланы «Хала-горк» оьзенден таба ичеген сув булан таъмин этмек учун сувну тазалайгъан алатланы, къурашдырыв ишлени барышын малим этди. Бу гьажатлагъа 134 миллион манат харж гёрсетилген. Подрядчик «Абукъ» ООО.

Дёргели, Къакъашура, Къакъамахи , Жанга, Гьели ва районну оьзге юртларыны ватандашларын таза ичеген сув булан малим этивде этилип турагъан ишлени, гёз алгъа тутгъан планланы аянлашдырды.

Оратор оьзюню сёзюн давам эте туруп, ёл фонддан таба «Мени Дагъыстаным-мени ёлларым» деген программа булан районну муниципал къурулувларында ёлланы, орамланы онгарывда, асфальт этивде этилип турагъан ишлер булан залдагъыланы юртлардагъы орамланы атларын, асфальт салынма герек мезгиллери булан аян этди. Гертиден де, ёл фонд программа булан юртланы орамларын онгарывда хыйлы ишлер этилип тура.

Сессияда И.Абдулмежитов билим берив тармакъда 2020-нчы йыл къурулма ва пайдаландырывгъа берилме герекли объектлерде къурулуш, къурашдырыв ишлени барышы гьакъда маълумат берди. Барыгъызгъа да белгили кюйде, Къарабудагъгентде – 250 яшгъа, Дёргелиде – 200 яшгъа, Жангада 120 яшгъа ери булангъы яшлар бавлар къурулуп тура. Бу объектлер йылны ахырында пайдаландырывгъа берилме герек. Уьчюнчю кварталда ишлер мекенли чалтлашгъан. Объектлени пайдаландырывгъа беривню болжаллары йырылывгъа къоркъунчлукъ ёкъ.

И.Абдулмежитов оьзюню докладында 2020-нчы йылда «Местные инициативы», «Комфортная городская среда» ва оьзге программалар булан этилип турагъан ишлени де суратлап чыкъды. Депутатлар докладчыгъа гьар тюрлю соравлар берип, тийишли жаваплар алдылар.

Экинчи масъалагъа гёре сессияда район администрациясыны акъча ишлер управлениесини ёлбашчысы А. Шагьманаев маълумат берди.

Къарабудагъгент районну прокуратурасы районну уставын федерал, регионал законлагъа гёре ёрукълашдырма герек деп язгъан “представлениесине” гёре сессияда район Жыйыныны депутатларыны председателини орунбасары Магьамматдагьир Вагьапов баянлыкъ берди.

Сессияда докладдан ва сёйлев­лерден сонг, районну башчысы М.Амиралиев сёз алды. Ол биринчилей гьалиги чакъырывну депутатлары районну ватандашларыны пайдасы учун арымай-талмай ишлегени, районда социал экономика масъалаланы чечивде актив кюйде ортакъчылыкъ этгени саялы разилигин билдирди. Оьзюню къысгъаракъ сёйлевюнде районну башчысы М.Амиралиев районда транспорт налог жыйывну гётерме, шо акъчалар гьар юртгъа жыйгъан транспорт налогну къадарына гёре юртлагъа берилегенин, юртну башчысы жамият булан гьакълашып, оьзлер сюйген орамны онгарма болагъанын англатды. Районну башчысы оьзюню сёйлевюнде 2020-нчы йылгъа районну ёл хозяйствосуна – 30 миллион, 2021-нчи йылгъа 40 миллион 670 минг манат гёрсетилме болагъанын яшырмады. Шо буса транспорт налог жыйывну къадары артагъанны ачыкълашдыра туруп, юртланы ёлбашчылары, оьзге къуллукъланы къуллукъчуларыны рагьатланма ихтияры ёкъну англатды.

Ондан къайры да район муниципалитетни башчысы районну территориясында 2021-2022-нчи йылларда «Комплексное развитие сельских территорий» деген республика программагъа гёре этме гёз алгъа тутгъан ишлер ДР-ни башчысы Владимир Васильевни янындан якълав тапгъанны англатды.

Район Жыйыныны депутатлары сессияны барышында арагъа салынып ойлашылгъан масъалалагъа гёре тийишли къарарлар къабул этдилер.

Сессияны ишин тамамлай туруп, районну башчысы М.Амиралиев депутатлагъа болажакъ сайлавларда уьстюнлюк ёрады.