Гьаракаты яхшы
Артдагъы йылларда бизин райондагъы спорт идаралагъа айрыча яхшы тергев берилме башлагъаны соравсуз да гёрюнюп тура. Айтагъаным, ерлердеги ДЮСШ-лерде спорт инвентарлар, ябушагъан хас халчалары, авурлукъ гётеривдеги секцияланы гиралары, штангалары, боксёрлар учун тарыкълы «грушалар» ва олай да кёп тюрлю оьзге спорт къураллар йылдан-йылгъа янгыртыла юрюй. Ишни шо ягъына бизин районну ёлбашчысы Магьмут Амиралиев, спорткомитетни председатели Завур Умаракъаев гьайлы янашалар. Шо саялы артдагъы вакътилерде орамлардан эсе спорт школалагъа кёп яшёрюмлер къуршалагъан болгъан. Шогъар юртлардагъы ДЮСШ-лерде йылдан-йылгъа спорт секцияланы, олагъа къуршалагъан яшёрюмлени артып юрюйгени де шагьатлыкъ эте.
Бу макъалабызда биз Паравулдагъы ДЮСШ-ни ишлери гьакъда хабарламагъа сюебиз. Эсгерилген ДЮСШ-ге ёлбашчы болуп гьаракатчы ва бажарывлу улан Агьмат Магьамматов белгиленгенден берли, школаны ишлери бютюнлей алышынгъан деп айтма ярай. Айтагъаным, Агьматны гьаракаты булан сайланып жыйылгъан 10 тренер бугюнлерде эсгерилген ДЮСШ-деги 11 де группагъа ёлбашчылыкъ этелер. Шо группалагъа (секциялагъа) буссагьатгъы вакътиде 260-дан да артыкъ спортчу яшёрюмлер къуршала. ДЮСШ-ни директору Агьмат Магьамматов бизге береген баянлыкъгъа гёре, шу спорт школада яшёрюмлеге машгъул болмакъ учун бары да имканлыкълар болдурула. Агьмат Магьамматов айтагъан кюйде, оьзлени школасында тутушуп ябушув, ушу-саньда, авурлукъ гётерив, футбол, волейбол оюнлар чинк де яшлар кёп сююп къуршалагъанларындан гьисаплана. Ябушагъан яшларыбыз учун бизин хас залыбыз бар. Футбол оюн булан машгъул болагъанлар учун 40x70, 110x60 метр майданы булангъы 2 спорт майданчабыз да бар. Волейбол оюнну буса яшларыбыз 2 номерли школаны спортзалында ойнайлар. Оьзге тюрлю секцияланы яшларына да уьйренивлени вакътисинде къолламакъ учун тарыкълы болагъан спорт инвентарлар булан да школабыз бютюнлей таъмин деп айтмагъа болабыз. Шолай имканлыкълар бар саялы болма ярай, чемпионларыбызны санаву да йылдан-йылгъа артып юрюй. Масала, тутушуп ябушувдан 70 кило авурлукъда ябушагъан бизин кочабыбыз Давут Ибрагьимов – Европа ярышларыны призёру, 48 кило авурлукъда ябушагъан Биярслан Келеметов – охувчу яшланы спартакиадасыны алдынлысы, Россия ярышларында гюмюш медаль къазангъан кочабыбыз. Сонг да, 57 кило авурлукъдагъы кочабыбыз Малик Омаров, 48 кило авурлукъдагъы Магьамматамин Давутов – Дагъыстанда биринчилик учунгъу ярышланы алдынлылары. Оьтген 2019-нчу йылда алдынлы ерлени алма бажаргъан ушистлени атларын да Агьмат кёп сююп эсгерди. Юсуп Мугьутдинов 56 кило авурлукъда Кун-фу-дан Дюньяны чемпиону, Дагъыстанны да бир нече керен чемпиону болгъан. 55 кило авурлукъда дюньяны кубогун къазангъан Магьамматясин Къайирбеков, авурлукъ гётеривде бизин штангистлер Абдулвагьит Герейханов, яш штангист Арсанали Абдулманапов Дагъыстан ярышларда алдынлы ерлени алгъанлар. Эсгерилген кочапларыбызны ва олай кёп оьзгелерин спорт оюнланы ва ябушувланы тюрлю къайдаларына уьйретип юрюйген тренерлени де эсгерилген уьстюнлюклерде аслам пайы бар. Шолай тренерлерден Алавутдин Магьамматовну, Магьамматали Валиевни, Магьамматамин Сулеймановну ва Магьамматшапи Мугьутдиновну, Расул Темирбековну санамагъа ярай. Шо тренерлени гьар гюнлюк гьаракатыны натижасында шолай бажарывлу спортчулар арагъа чыгъагъаны мекенли,- деп сёзюн тамамлады Агьмат Магьамматов. Гертилей де, паравуллу спортчуланы гьаракаты йылдан-йылгъа алгъа абат алагъаны гёрюне.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
