Яш кочапланы уьстюнлюгю
Бу йылны март айыны орталарында Курск областны Льгов шагьарында 2007-нчи, 2009-нчу, 2010-нчу, 2012-нчи йылларда тувгъан яш кочапланы арасында тутушуп ябушувдан Бютюнроссия ярышлары оьтгерилген. Эсгерилген шо ярышларда Россияны гьар тюрлю регионларындан гелип жыйылгъан 200-ден де артыкъ яш кочаплар бир-бири булан гюч сынагъанлар. Шо ярышларда бизин районну Гьели юртундагъы ДЮСШ-де тренерлер Нюрислам Атагишиевни ва Магьамматнаби Халиловну уьйретивлери булан ябушувланы къайдаларына уьйренип юрюйген яш кочапларыны уьюрлери де ортакъчылыкъ этгенлер. Шоланы арасындан 3 кочабыбыз ярышларда алдынлы ерлени алмагъа да бажаргъан.
Масала, 22 кило авурлукъда ябушгъан Юнус Мугьажиров оьзюню авурлугъундагъы кочаплардан уьст гелип, 1-нчи, 28 кило авурлукъда ябушгъан Магьамматмухтар Зайнутдинов да оьзюню тенглилеринден гючлю чыгъып, 1-нчи ерлени алгъанлар. 29 кило авурлукъда ябушгъан кочабыбыз Динислам Атагишиев буса шо ярышларда 3-нчю ерге ес болгъан. Россия ярышларда алдынлы ерлеге ес болма бажаргъан гьелили яш кочапларыбызны ва оланы тренерлерин уллу ярышларда етишген уьстюнлюгю булан биз де оьктем болабыз ва оланы гьакъ юрекден къутлай туруп, гележекде де оьрлюклер ёрайбыз.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
