Санитар талаплар...
Пандемия себеп болуп бу йыл биз бусурманлар учун инг сыйлы Къурбанбайрамны авур шартларда оьтгеребиз. Айтагъаныкъ, районда коронавирус инфекция аврувну къоркъунчлугъу толу тайып битмеген. Шо саялы Къурбанбайрамны гьюрметине гьайван-мал соягъан заманда бир ерге кёп адам жыйылма гери урула. Июль айны 29-нда районну башчысыны ишчи кабинетинде районну башчысы М.Амиралиевни, юртланы башчыларыны, Каспийск шагьаргъа ва бизин районгъа къарайгъан Роспотребнадзор управлениесини ёлбашчысы О.Абачараевни, районну юрт хозяйство управлениесини начальниги Ш.Мустапаевни ортакъчылыкъ этивю булан районда Къурбанбайрам гюнлени оьтгереген заманда санитар-эпидемия чараланы тюз юрютюв масъала арагъа салынып ойлашылды.
Чараны юрюте туруп, районну башчысы М.Амиралиев юртланы башчыларына халкъланы арасында Къурбанбайрам гюнлени вакътисинде профилактика ва агитация чараланы гючлендирме тапшурувлар берди. Ол юртланы башчыларына имамлар оьзлени насигьатларын коронавирусну къоркъунчлугъуна байлавлу англатыв насигьат этив ишлени оьтгерме таклиф этди.
Районну баш санитар врачы О.Абачараев районда санитар-эпидемиология гьалны суратлады ва Къурбанбайрамны оьтгереген гюнлер Роспотребнадзорну талапларын тюз юрютме тарыгъын англатды.
Демек, Къурбанбайрамны оьтгереген гюнлерде районну территориясында къошум санитар-эпидемиология чараланы артдырма герек, чинкдеси:
-кёп халкъны ортакъчылыкъ этивю булан чаралар оьтгерив гери урула;
- гьайван соягъан ерде жыйылгъан адамлар социал аралыкъланы тюз юрютме, оланы арасы бир метр ярым арек болма тюше;
- гьайван соягъан ерде бар адамланы санавун ёрукълашдырма, гьар адамгъа 4 квадрат метр тиеген кюйде жыйылма таклиф этиле;
- гьайван соягъавн ердеги ёлдашланы къорув алатлары (маскалары, къолгъаплары, гигиена алатлары болма герек;
- гьайван союлагъан ерлерде алданокъ дезинфекция чараланы оьтгерме таклиф этди.
Оьзюню сёйлевюн тамамлай туруп, баш санитар врач районну ватандашларын Къурбанбайрам булан къутлады ва коронавирусну къоркъунчлугъу гьали де тайып битмегенин англатды.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
