Киринив сезон ачылды

Муна, бу йылны июль айыны 23-нде де эсгерилген «Язбаш» зонада киринив сезонну ачылывуна багъышланып арив мердеш оьтгерилди. Шо шатлыкъда район администрацияны башчысыны биринчи орунбасары Агьмат Гьажиев, республикада загь­матгъа ва социал ишлеге къарайгъан министрни орунбасары Мурат Къазиев, «Билайн» компанияны ёлбашчысы Абсалутдин Магьамматов, олай да республика, район къурумларындан гелген хыйлы къонакълар, «Язбаш» къурумну кёп санавдагъы уьюрлери ва районну маданият къуллукъчулары ортакъчылыкъ этдилер. Шо шатлы мердешни ача туруп сёйлеген «Язбаш» къурумну ёлбашчысы Али Мусаев жыйылгъанлагъа оьзю башчылыкъ этеген къурумну ишлери гьакъда ачыкъ баянлыкълар берди. Сонг сёз берилген районну башчысыны биринчи орунбасары Агьмат Гьажиев оьзюню сёйлевюн «Язбашны» уьюрлерин бу йылгъы киринив вакътини ачылыву булан къутлай туруп башлады. Олагъа барысына да шу исси вакътиде денгизни йылы суву, ягъасындагъы къайнар къайыры (песогу) эмли дарман болуп, къаркъараларына савлукъ гелтирсин деп ёравлар этди. Сонг чыгъып сёйлеген министрни орунбасары Мурат Къазиев, «Билайн» компанияны ёлбашчысы Абсалутдин Магьамматов ёлдашлар да шатлыкъны ортакъчыларын шо гюнгю шатлы мердеш булан къутлады. Мердешде гьаманда йимик, районну маданият идарасыны йыравлары, музыкантлары Абдулазим Найипханов, Магьамматбек Къагьруманов, Нюрияханым Умарова жыйылгъанланы оьзлени къурч йырлары булан къурчун къандырдылар. Шо гюн эсгерилген зонада сакъат ампутантланы арасында юзювден, гьава тюбек булан атышывдан, авурлукъ гираланы гётеривден, “нард”, “шашки”, “дарс” оюн­лардан республика ярышлары оьтгерилди. Эсгерилген ярышларда шатлыкъгъа жыйылгъанланы кёплери ортакъчы­лыкъ этдилер. Турнирде алдынлыкъ алгъан ёлдашлар спорт гёлеклер, медаллар ва акъча савгъатлар булан савгъатландылар.