Меню
16+

Сетевое издание «Будни района»

03.07.2020 09:29 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Уьлгюлю адам эди

Автор: Багьавутдин Самадов
журналист ва шаир, СЖР-ни ва СРП-ни уьюрю

Гьар ким яшайгъан яшавунда абурлу ат къазанмагъа, халкъына къуллукъ этмеге чалыша. Олай да, топуракъ тармакъда загьмат тёкгенлени атлары айрыча эсгериле деп айтмагъа ярай. Неге тюгюл, гьалиги девюрде де халкъ топуракъда ишлемеге гиришген ва шону къыйынын биле.

Салаватов Илмиямин Салаватович 1938-нчи йылны март айында Уллубийавулда тувгъан. Ата юртундагъы орта мактапны битдирген сонг, ол Дагъыстан юрт хозяйство институтда оьр билимге ес бола.

Оьзюню загьмат ёлун Илмиямин Салаватов анадаш колхозунда 1963-нчю йылда агроном болуп башлай. Колхоздан хозяйство совхозгъа гёчюрюлгенде, ол “Буйнакский” совхозну баш экономистини къуллугъунда 1965-1968-нчи йылларда чалыша.

Илмиямин Салаватовну гьаракаты, билими, сынаву бошуна гетмей. Демек, ону 1969-нчу йылда ерли “Буйнакский” совхозну директоруну къуллугъуна белгилей. Ол шо ишде 1981-нчи йыл болгъунча ишлей..

Сонггъа таба, “Дагвино” къурумну УПК-сыны директору болуп загьмат тёге. 1987-нчи йылдан 2005-нчи йылны ахырына ерли янгыдан анадаш совхозда гьар тюрлю къуллукъларда ишлей.

Артдагъы йылларда ол ерли юрт администрацияда ВУС-ну начальниги болуп чалышды.

Озокъда, Илмиямин Салаватов юрт хозяйство тармакъда ишлейгенде бир къадар уьстюнлюклеге етишмеге бажарды. Шо йылларда юртну халкъыны социал ва коммунал яшаву яхшылашды деп айтмагъа тийишли.

Илмиямин агьлюсю Гюлнашират булан 5 яшны оьс­дюрдю ва тарбиялады. Олар барысы да оьр билимлер де алып, гьариси бир тармакъда загьмат тёге. Гюлнашират Салаватова да ата юртундагъы юрт мактапда 54 йылны боюнда юртлу яшлагъа ва оьсюп гелген наслулагъа билим берген, оланы гьар-бир гьакъылгъа уьйретген.

Шолай уьлгюлю ожакъны башчысы Илмиямин де оьз­ден хасиятлы адам эди деп айтмагъа болабыз. Ишинде етишген оьрлюклери ва уьстюнлюклери саялы, Илмиямин Салаватов пачалыкъны янындан кёп тюрлю савгъатлагъа ес болгъан. Масала, огъар “Макътавлукъну белгиси” деген орден, “Уьлгюлю загьматы саялы” деген медаль тапшурулгъан. Олай да, “ДР-ни ат къазангъан юрт хозяйство къуллукъчусу” деген гьюрметли ат берилген.

И. Салаватов юрт ва район Советлеге депутат болуп да сайлангъан. Пенсиягъа чыкъ­гъан сонг буса, ол Уллубийавул юртну тамазаларыны Советини председатели де болду. Демек, яшав ва загьмат якъдан сынав топлагъан сонг, ол шоланы оьсюп гелеген наслугъа берди ва уьйретди деп айтмагъа болабыз.

Бу йыл сыйлы Рамазан айны ахыр гюнюнде, оьзюгер 82 йыл битгенде, узакъ да аврумайлы, Илмиямин бу дюньядан бириси дюньягъа гёчдю.

Илмиямин Салаватов ва ону ишлери халкъны эсинде даимликге къалажакъ.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

1