Меню
16+

Сетевое издание "Району яшаву"  «Будни района»

03.07.2020 09:25 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Парадны ортакъчысы

Автор: Шихав Къайирбеков

Уллу Ватан дав битгенли бу йыл 75 йыл тамамланды. Уьлкени башын тутгъанлар Уьстюнлюкню Гюнюн бу йыл уллу шатлыкъларда къаршылама гёз алгъа тутгъан эди. Амма, дюньягъа къоркъунчлукъ къопдургъан коронавирус аврувну яйылывуну алдын алмакъ муратда гьакимбашлар Уьстюнлюкню гьюрметине оьт­герилеген дав парадны оьтгеривню артгъа теберген эди. Муна июн айны 24-нде уьлкебизни тахшагьары Москвада ва бир нече уллу шагьарларда Уьстюнлюкню 75 йыллыгъына байлавлу болуп къаравчуланы, парадгъа чакъырылып гелген оьр къонакъланы делегацияларын гьайрангъа къалдырардай парад оьтдю.

Уллу Уьстюнлюкню 75 йыллыгъына байлавлу дав парадны 9 майда оьтгерме бажарылмагъан сонг, июн айны 24-юне гёчюрмеклигине не себеп бар деп ойлашагъанлар кёп бардыр.

Маълумат берейик: Советлер Союзуну савутлу гючлери савлай бютюн совет халкъ немис-фашист елевчюлени оьзлени уясында дагъылтып къанлы къыргъын давларда уьст болуп, рейхстагны къалкъысына Уьстюнлюкню ал байрагъын къакъгъанда, СССР-ни савутлу гючлерини Оьр командющийи И. В.Ста­лин дав майданларда герти къоччакълыкъ гёрсетип ябушгъан, ёлбашчы­лыкъ этген сержантдан тутуп оьр чинлеге ерли давну ортакъчыларындан сайлап 9 май байрамны гьюрметине Москвада 1945-нчи йылны июн айыны 24-нде дав парад оьтгерилген.

Шо йыл оьтгерилген парадда бизин районну вакили, гьелили Сагьадулла Агъаев сайлам воинлени сыдраларында Къызыл майдандан оьтген.

Сагьадулла Агъаев 1917-нчи йылда Гьелиде сабанчыны агьлюсюнде тувгъан. Ону бары англавлу яшаву дав ва загьмат фронтларда ябушув булан гетген. Яшёрюм чагъындан тутуп комсомолну сыдраларына гирген. Ол – юртда янгы яшав къурувда актив кюйде ортакъчылыкъ этгенлени бириси.

1938-нчи йыл Сагьадулла Агъаевни Къызыл Армияны сыдраларына къуллукъ этме чакъыргъан. Армияда къуллукъ этеген вакътисинде ол оьзюню лап яхшы янындан гёрсетме бажаргъан. 1939-нчу йыл, Сагьадулла Агъаевни уьлгюлю къуллукъ этегени саялы, къысгъа болжаллы курслагъа охума бакъдыргъан. Курсланы уьстюнлю кюйде тамамлагъан сонг, огъар старший сержант деген чин бериле ва бёлюкню (отделенияны) командири этип белгилей.

Дав башлангъынча Сагьадулла Агъаев Украина ССР-ни тахшагьары Киевде къуллукъ эте. Ону булан бирче юртлусу Шагьабутдин Магьамматов, Къакъамахиден Магьаммат Абдурагьимов деген ёлдашлары да болгъан.

Ватаныны алдындагъы сыйлы борчун кютюп уьйге къайтма заман етгенде, “немис-фашист елевчюлер ватаныбызгъа намарт кюйде чапгъын этген” деген аччы хабар яйыла. “Тревога” билдирип, Сагьадулла Агъаев къуллукъ этеген 657-нчи артиллерия полк аякъгъа тургъузула. Сагьадулла Агъаев Къыбла, Прибалтика, Ленинград фронтланы сыдраларында уьлкени топуракъларын душмандан азат этивде къоркъунчлукъ билмей уста кюйде ябушгъан. Оьлюмге бете-бет тургъан, гьар мюгьлет ахырынчы болуп къалма болагъан гезиклер аз болмагъан. Дав майданларда бизин макъаланы игити бир нече керенлер яраланса да, Тенгирибиз ону оьлюмден сакълагъан, дав битип уьюне эсен аман къайтма насип болгъан.

Давдан къайтгъан сонг, С.Агъаев загьмат фронтда халкъ хозяйствону аякъгъа тургъузувда да яллыкъ билмей загьмат тёкген. Гьар тюрлю жаваплы, ёлбашчы къуллукъларда ишлеп, ата юртуну, районуну экономикасын гётеривде аслам къошум этген.

Дав ва загьмат фронтда гёрсетген гьаракаты, къоччакълыгъы саялы, 1945-нчи йылда болгъан биринчи парадны ортакъчысы Сагьадулла Агъаевни тёшюн Уллу Ватан давну биринчи ва экинчи даражалы орденлери, эки «Къызыл юлдуз», «Загьмат Къызыл байракъ» орден ва 14 медаль безеген, огъар Оьр командующийни къол салыву булан берилген баракалла кагъызлары да бар эди.

Биз Сагьадулла Агъаев йимик Ватаныны, азиз халкъыны эркинлиги учун къан тёкген, дав майданларда жанын къурбан этген игитлерибизни атларын бир заманда да унутма тарыкъ тюгюлбюз.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4