Давну отун гёрген

- Шуну булан мен айтмагъа сюеген зат, мени эркъардашым Чонту Абдуллагьатов да шо къыргъынлы давланы вакътисинде оьзюню 18 йыллыкъ чагъына да къарамайлы, 1943-нчю йылда, давланы лап да къызгъын юрюлюп турагъан вакътисинде гёнгюллю кюйде армияны сыдраларына гете. Ол барывундокъ Арменияны Турция булангъы дазусундагъы частлагъа бакъдырыла. Шо вакъти Чонту Абдуллагьатов дазуланы душмандан сакълавда да кёп тюрлю, четимли ябушувларда ортакъчылыкъ эте. Шолай четимликлени уьстюнлю кюйде чечме бажаргъаны саялы, ол кёп тюрлю медалланы къазанма да бажаргъан. Дав битген йыллардан сонг да Чонту Абдуллагьатов 1953-нчю йыллагъа ерли анадаш ватанына къуллукъ эте туруп армияда къала. Сонг старшина чын булан ата юртуна къайтып загьмат фронтда къуллукъ этивюн узата. Шо йылларда оьсюп гелеген яш уланланы-къызланы патриот ругьда тарбиялавда ДОСААФ-ны къуруму айрыча иш гёрсетеген къурумланы бириси санала эди. Къардашым Чонтуну армиядан къайтгъан йылларындан башлап, райондагъы ДОСААФ­ къурумгъа ёлбашчы этип бакъдырдылар, шо къурумда ол кёп йыллар яш наслуну патриот ругьда тарбиялай туруп загьмат тёкдю. Къол пулемёт булан атышывгъа, гьызарлавгъа разведкагъа ва оьзге армия касбучулагъа кёп санавдагъы районлу яшёрюмлени уьйретди. Шо вакътиги Республика ДОСААФ-ны ёлбашчысы, сонггъа таба бизин районну военкоматыны ёлбашчысы, савлай республикагъа аты айтылгъан Шайых Велибеков Чонтуну атына хыйлы баракалалар билдирген. Чонтудан къайры да узукъарым Арсан Абдуллагьатов, агъам (дядя) Имамутдин Абдуллагьатов, Жамалут­дин Абдуллагьатов ва олай да къавумубузну кёплери бизин бугюнгю яшавубуз учун къан тёкгенлер, сан сёкгенлер. Шо саялы да, оланы бириси де бугюнлерде бизин арабызда ёкълугъуна да къарамайлы, оланы атына даим абур этмеге герекбиз. Гележек яш наслуларыбыз оланы унутмасын учун даим де эсгере турсакъ, дагъы да яхшы болур,-дей Анвар Абдуллагьатов сёзюню ахырында.