Борчлу къутулмас

Жыйында районну башчысы М.Амиралиев, ону биринчи орунбасарлары, администрацияны бёлюклерини ёлбашчылары, юртланы башчылары, райцентрдагъы идараланы ёлбашчылары ортакъчылыгъын болдурдулар.

Жыйынгъа районну ич ишлер бёлюгюню орунбасары Руслан Халдузов, районну суд приставларыны ёлбашчысы Руслан Баймурзаев, 14 номерли районара налог инспекцияны начальниги Магьаммат Тидуллаев ёлдашлар гелген эдилер.

Жыйынны башында районну башчысы Магьмут Амиралиев районда коронавирус инфекция аврув булангъы гьалны суратлады. Ерлерде гьал ёрукълаша, янгы авруйгъанланы санаву тёбен даражада, районну азарханасында пневмония аврувдан авруй деп токъташдырылгъан 29 адам барын малим этди.

Коронавирус инфекция аврувну яйылывуну алдын алывда, авруйгъанланы сав этивде оператив штабны ролюн, медицина къуллукъчуларыбызны гьаракатын, оьзге ёлдашланы кёмегин уллу гьюрмет булан эсгерди.

Шо гюн оьтгерилген жыйынны иш низамында «Къарабудагъгент район» муниципал районну беклешдирилген бюджетини гелим бёлюгюню 2020-нчы йылны июн айыны 1-не план гьасиллени толуву тёленмей къалгъан налогланы жыйыв арагъа салынып ойлашылды.

Бу масъалагъа байлавлу болуп, районну башчысыны орунбасары, районну налог управлениесини ёлбашчысы Сапиюлла Сайитов баянлыкъ берди. Ол оьзюню сёйлевюнде районну консолидированный бюджетини гелим бёлюгюню 2020-нчы йылны июн айыны 1-ине 64 процентге толгъанын ачыкъ этди. Сапиюлла Сайитов район бюджетни толтурмакъ, налогланы толу кюйде жыймакъ учун 2019-нчу йылда гёрюлген, оьтгерилген къурумчулукъ ишлени, чараланы уьстюнде токътап сёйледи. Гёрюлген чараланы натижасында 866 адам булан загьмат дыгъарлар байлангъан, 259 адам ИП, КФХ-ны ёлбашчысы гьисапда налог учётда токътагъанлар.

Сапиюлла Сайитов налогланы гьакъында айта туруп, районда 315 миллион манатгъа налог борч, шону 275 миллион манаты далапчылар, борчлу транспорт налог экенин аян этди.

Бу масъалалагъа байлавлу Магьаммат Тидуллаев, Руслан Баймурзаев ёлдашлар да чыгъып сёйледилер. Олар налогланы толу жыйылывун, борчланы тёлевюн болдурмакъ учун бирликде иш гёрме герегин эсгердилер.

Жыйынны гьасиллерин чыгъарып сёйлей туруп, районну башчысы Магьмут Амиралиев тийишли къуллукълагъа, районну беклешдирилген бюджетини гелим гесегини толувун болдурмакъ учун гьаракатны гючлендирме, районда далапчылыкъ гьаракатда низам салма чакъырды. Юртланы башчыларына транспорт налоггъа борчлары бар ёлдашлар булан англатыв ишлер юрютме, уллу оьлчевлерде транспорт налоггъа борчлары бар ёлдашланы оьзюню янына чакъырма тапшурувлар берди.