Меню
16+

Сетевое издание «Будни района»

03.07.2020 09:20 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Бары да имканлыкъланы къоллама тарыкъ

Автор: Шихав Къайирбеков

Халкъ арада «Къыш-къышлыгъын этмей къоймас» деп айтыв юрюле. Амма районну гьайванчылыкъ тармагъыны къуллукъчуларына гьайванлагъа токъ къышлав болдурувдан хантав турма тюшмей. Ем топлавну болжалы битгендокъ, базарларда къатты емлени багьалары чалт гётериле. Ерлерде ем топлав массовый кюйде юрюле буса да, буссагьатда да къатты емлени багьалары яхшы гётерилген. Бир тай салам-110-115манат, бир тай бичен – 150-155 манат. Люцерна тайны багьасы 200 манатдан оьте.

Базар аралыкълы девюрде хаммалгъа багьаны талап, къытлыкъ токъташдыра. Бизин якъларда, мунда Къарабудагъгент районда бу йыл жамият гьайванлагъа ем топлама авур. Эрте язбашыбыз къургъакъ гелгенге гёре, 2 минг гектардан да къолай табии биченликлерибизден къаравулланагъан къатты емлени топлама къыйын.

Емлени яртысын да топлама бажарылмайгъаны гьакъ. Оьзге йыллар бир гектар табии биченликлерден, чачылмай къалгъан топуракъланы чалгъанда 110-150 тай чыгъа эди буса, 2020-нчы йылда орта гьисапда 50 тай да чыкъмай. Озокъда, бираз кёп тайлар чыкъгъан участкалар да бар. Амма районда емлер топлавну масъаласы авур.

Чакъ къургъакъ гелген деп, гьайванланы къышлавуну гьайын этмей къойма да ярамай.

Гьалдан нечик чыкъма бола?

-Биринчиси, районда хас статистика маълуматлагъа гёз къаратгъанда, 1132 гектаргъа чачылгъан кёп йыллыкъ отларыбыз бар. Шо участкаланы болгъан чакъы асувлу къоллап, бар сувларыбыздан пайдаланып, 4-5 керен чалма гьаракат этме тюше. Люцерна тарлавну заманында оруп, къысып тарлавдан чыгъарса, оьсюмлюк чалт оьсе. Озокъда, бу йыл йимик къургъакъ йылда сугъарыв сувну масъаласы да чы бар.

Экинчиси, ерли шартларда таман даражада ем топлама имканлыкъ ёкъ буса, артгъа салмай тышдан емлени гелтиривюн гьайын этсе, яхшы болур.

Озокъда, мен емлени къышда базардан сатып алып къояман дейгенлер бардыр. Олайлагъа да бирев де, бир зат да айтып болмай. Гьар кимни оьз ихтияры бар. Бир зат ачыкъ: «Къызгъанч эки керен утдурур» деген халкъ айтывну да унутма тюшмей.

Гьали къатты емлени багьалары шулай гётеринки буса, чакъгъа салкъын тюшгенде, авлакълардан емлер къайтарылып битгенде багьасы нечакъы болур? Болдурулагъан продукцияны оьзюне токътайгъан багьасы нечакъыгъа гётерилер, далапчыны экономика гьалына терс яндан таъсир этмесми?

Районда бар гьайван, малгъа токъ къышлав болдурмакъ учун бизин гьайванчыларыбызгъа умуми алгъанда 45 минг тон къатты емлер тарыкъ. Тири емлер булан масъала онча авур болмас, тек къатты емлени масъаласы бары гьакъ.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

2