Меню
16+

Сетевое издание «Будни района»

03.07.2020 09:15 Пятница
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Баракалла сизге, докторлар!

Автор: Умусалимат Бутаева,

Артдагъы уьч-дёрт айны ичинде дюньяны бары ерлеринде йимик,бизде де халкъыбызны яшавунда къыйынлы гьал тувулунду. Бир де болмагъандай оьлюлер-къайгъылар, къыйын гьалгъа тюшюп авруйгъанлар, олагъа не этегенни билмейген, къыргъа чыгъып да болмайгъан адамлары, нечик буса да сав къалгъанлары, сонг аврув булан ябушув, уьст гелме башлав. Бу гьалны ичинде биринчилей белгисиз балагь булан ябушма тюшген медицина къуллукъчулар эди, гьали де дюр.

Белгисиз аврув, къувунлу гьал, адам бетинге телмирген, сенден кёмек гёзлей, яшавну натижасы сенден гьасил. Не этме герек? Врачланы, бары да медицина къуллукъчуланы уьстюне авур намус тюшдю. Шо намусну Къарабудагъгент район больницаны къуллукъчулары топлангъан сынавун къоллап, къолундан гелегени булан, йылы сёзю булан бек гьаракат этип кютмеге гьаракат этдилер. Гече демей-гюн демей чалышдылар, оьзлер де аврудулар, турдулар. Врачлар, олар булан янаша сынавлу медсестралар, жагьил къызлар, рентгенде ишлейген уланлар – булар барысы да гьакъ юрекден берилип ишледилер. Аврувлагъа илиякълы сёйлеп, маслагьат этип, шоссагьат къуллугъун битдирип ёлгъа сала эдилер.

Марат, Камил, Рашит, Шекер, Зугьра,Гюлжанат, Диана, Бурлият, Найида, Илмугьаят, Лайла ва мен атын эсгермеген оьзге жагьил врачлар, врачлардай кёмек этеген сынавлу медсестралар – сиз оьзюгюзню адамлыгъыгъызны, билимигизни, къыйын болгъанда ишигизге герти янашып, авурлукъну бойнугъузгъа алып халкъыгъызгъа къуллукъ этдигиз, касбугъузгъа, халкъыгъызгъа аминлигигизни гёрсетдигиз.

Баракалла сизге, барыгъызгъа да!

Сизин ва бизин йимик авругъанланы якълагъан ватандашларыбыз да оьзлени оьзденлиги, чомартлыгъы булан халкъына авур болгъанда табулду, кёмек къолун узатды ва оьзлени халкъына аминлигин гёрсетди.

Гёрмемишлик тюгюл, герти, гьакъ юрекден этилген зувап ишлеригиз учун баракалла, Аллагьны янындан къабул садагъа болсун,сизин ожакъларыгъызгъа савлукъ, берекет болуп къайтсын!

Нечакъы сюймесек де, бизге де больницаны ичин гёрмеге тюшдю. Кепсиз болдукъ. Рентгенден чыгъарып, ятма йиберсе де ятмай, лечение алып уьйде этип турдукъ, Аллагь рази болсун,гелинибиз гелип системалар да салып, уколлар да этип, таблеткалар да бердилер. Тек эсги аврувларыбызны хозгъап, больницагъа бармасакъ бажарылмады. Биз уьягьлюм де булан уьчюнчю кьатда ятдыкъ. Онда ишлейгенлени, врачланы гьаракатын гёргенде, мен бек сююндюм, оьктем болдум, юрегиме хыйлы парахатлыкъ тувулунду. Магьамматов Камилни ёлбашчылыгъы булан ишлейген врачланы медсестраланы: Гюлжанат, Диана, Лайла, Найида, Илмугьаят, Жамиля, Илмугъаят, Сепият, Зугьра, Зарипат, Салигьат ва оьзгелерини гьаракатын гёргенде, олагъа гьакъ юрекден баракалла бермей болмайсан. Камил — Аллагь берген доктор! Гече демей, гюн демей, чабып геле, тергей, англата, кёмек эте. Камилге «Заслуженный врач» деген атны берген деген хабаргъа гьакъ юрекден сююндюк, неге тюгюл ол атгъа Камил тезден лайыкълы улан эди.

Мен оьзюм оьмюр боюм яшлар булан ишлеп, жагьиллени патриот ругьда тарбиялама гьаракат этип гелгенмен. Халкъыбызны, жагьил медицина къуллукъчуларыбызны асил ишлерин гёргенде, айрокъда мен охутгъанларын, гьакъ юрегимден сююнюп, оьктем болуп, осаллашгъан гьалыма ругь къошулду. Олар гелип гёнгюмню алып, гьариси оьз кёмегин этегенде буса, парахат болдум. Биз яшавдан гетсек де, шулай наслу орнубузну тутажакъ, биревлер ойлашагъанда йимик, бар зат къолдан чыкъмагъан, жагьиллеге инанма, яхшы ёл ёрама герек.

Аллагьгъа шюкюр! Дагъыстан къылыгъыбыз тас болмай, рагьму ва жавапчылыкъ – адамларыбызны оьр этегенлик. Шо буса адамлагъа да пайдалы, ­оьзлеге де абур. Абуругъуз артсын, аявлу ватандашларым! Сизин аврув къыйнамасын, авруйгъанлар бары къыйнасын, олагъа кёмек этме сизге Аллагьым савлукъ ва билим берсин!

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4