Транспорт налог ва ёллар
Газетибизни бетлеринде бу масъала гётерилегени биринчи гезик тюгюл. Республиканы ва олай да районну башчылары бу масъаланы чечме бегинден тутгъаны да негьакъ тюгюл. Биринчиси, янгыз бизин районда транспорт налоггъа 278 миллион манат борч бар. Экинчиси, алда ерлерде жыйылгъан транспорт налог къайда гетгенни бирев де билмей эди. Гьали район жыйгъан транспорт налог районгъа къайтып геле. Районну башчысы Магьмут Амиралиев къайсы юрт нечакъы транспорт налог жыйса, шо муниципалитетге пайлана. Шо акъча маялагъа юртланы орамларын, ёлланы онгарма бола.
Июль айны 21-нде районну башчысы М.Амиралиевни ишчи кабинетинде «Къарабудагъгент район» муниципал районда транспорт налогну жыйылывуна байлавлу чара оьтдю. Чарада ДР-ни башчысыны ойчусу Адилхан Гьанакъаев, районну ич ишлер бёлюгюню начальниги Герей Гереев, районну суд приставлар къуллугъуну ёлбашчысы Руслан Баймурзаев, 14 номерли МРИ-ни ФНС-ни начальнигини орунбасары М.Ибрагьимов, районну башчысыны 1-нчи орунбасалары ортакъчылыкъ этдилер.
Чараны юрюте туруп, ДР-ни башчысыны ойчусу А.Гьанакъаев республиканы башчысы муниципал районларда транспорт налогну жыйылывуна айрыча агьамият бакъдырагъанын, транспорт налогну жыйылывунгъа гёре районну башчысыны ишине багьа берегенин эсгерди.
Чараны барышында А.Гьанакъаев налог къурумланы ишин къатты кюйде танкъыт этди. Налог къурумлар транспорт налог базаны ёрукълу юрютмейгенин аян этди. Демек, ол бютюнлей налог базагъа инвентаризация этме, учётдан тайгъан транспорт къуралланы, борчлулардан ёкъ борчланы тайдырма таклиф этди.
А.Гьанакъаев сёзюн узата туруп, Къарабудагъгент районну транспорт налоггъа 278 миллион манат борчу барын аян этди. Мировой судларда буса 40 миллион манатгъа тюгюл административ ишлер ёкъ.
Районну суд пристав бёлюгюню ёлбашчысы Р.Баймурзаев оьзлерде транспорт налоггъа борчу бар 1614 дело барын, борчланы толу жыймакъ учун гёрюлюп турагъан чараланы эсгерди.
ДР-ни башчысыны ойчусу А.Гьанакъаев Р.Баймурзаев район приставланы къурумуну ёлбашчысы болуп ишни гьали башлагъангъа гёре оланы ишин олай танкъыт этмеди, тек оьзюню ёравларын айтды. Оьз гезигинде Р.Баймурзаев налогланы, айрокъда транспорт налогну жыйывда алдынлы къайдаланы генг кюйде къолланма чара гёрюп турагъанын малим этди.
Районну ич ишлер бёлюгюню начальниги Г.Герев оьзлени къуллукъчулары налоговый къурумлагъа, суд приставлагъа налогланы борчланы жыйывда даим кёмек этме гьазирин англатды.
А.Гьанакъаев транспорт налогну ва борчланы жыйывну артдырмакъ, гётермек учун налог инспекциягъа районну паспорт службасы булан тыгъыс байлавлукъда иш гёрме таклиф этди.
Районну башчысы М.Амиралиев оьзюню сёйлевюнде район администрация налогланы, шону ичинде транспорт налогну толу жыйылывун болдурмакъ, транспорт налоггъа борчланы къайтармакъ учун бары гючюн, гьаракатын бакъдыргъанны эсгерди. Ол район транспорт налог гьисапда республикадан 30 миллион манат акъча алажагъын ачыкъ этди. Шо акъча муниципал районну ёл фондуна бакъдырылажакъ ва ерлерде ишлер этилежек.
Арагъа салынып ойлашылгъан масъаланы яшавгъа чыгъара туруп, ГИБДД-ни, налог инспекцияны, суд приставланы ва район администрацияны жаваплы къуллукъчуларын къуршап, ишчи группа къуруп иш гёрме токъташдылар. Ишчи группа трассагъа чыгъып транспорт налоггъа борчлары бар автотранспортну тергежек. Ондан къайры да районну башчысы гьар жума ишчи группаны ишини гьасиллерине къаражакъ ва ДР-ни башчысыны ойчусуна районда транспорт налогну жыйылывун малим этежек. Районну башчысы М.Амиралиев транспорт налог толу кюйде районгъа къайтагъанын, шо харжлар юртларда ёлланы, орамланы ремонт этивде харжланагъанын бирдагъы керен такрарлады.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
