Савлугъун камиллешдирмек муратда

Оьтгерилеген физкультура, спорт, савлукъ беклешдирив ишлер 2005-нчи йылны октябр айыны 6-нда къабул этилген «Об общих принципах организации местного самоуправления в Российской Федерации» деген 131 номерли ва 2007-нчи йылны декабр айыны 4-нде къабул этилген 329 номерли Федерал законлагъа гёре кюрчюленип юрюле.

Спортну оьсювю Къарабудагъгент районну юртларыны оьсювю учун инг де асувлу агъымланы бириси болуп токътагъан. Шо саялы да яшланы ва яшёрюмлени спортну гьар тюрлю жураларына къуршамакъ муратда кёп иш этиле ва тергев бериле. Демек, гележек наслуну савлугъу бизин районну гележегини уьстюнлю оьсювю болуп токътай.

Бизин районну спортшколаларында яшланы ва яшёрюмлени толу кюйде спортгъа къуршамакъ муратда спортну 17 тюрлю журасындан уьйретив дарслар юрюле: эркин тутушуп (вольная), ябушув греко-рим ябушув, дзюдо, самбо, бокс, греплинг, кикбоксинг, тайбокс, къол булан тутушуп ябушув, армейский тутушуп ябушув, каратэ-до, футбол, волейбол, баскетбол, авур атлетика, пуйэрлифтинг, ушу-саньда.

Къарабудагъгент юртну «Бекенез» деген стадионунда шагьмат ва шашки оюнланы сюегенлер учун «Белая ладья» деген шагьмат клуб иш гёре.

Къарабудагъгент район физкультура ва спорт ишлени оьсювюн болдурмакъ муратда оьтгерилеген бары да конкурсларда ва ярышларда ортакъчылыкъ этип, ДР-ни муниципал къурулувларыны арасында алдынлы ерлени алып юрюй. Шолай, спорт ярышларда ортакъчылыгъы булан Къарабудагъгент район 2015-нчи йыл – 1-нчи, 2017, 2018, 2019-нчу йылларда 3-нчю ерлеге ес болгъан.

Бизин райондан чыкъгъан спортчулар Дагъыстан спортну оьсювюне гёрмекли къошумун болдуруп юрюй.

Белгили спортчуланы эсге ала туруп, районну спортуну оьсювюнде аслам къошумун этгенлени атларын эсгерсек, тюз болар деп ойлашаман:

Анвар Муратов – Дагъыстанда тутушуп эркин ва классика ябушувланы бир нече керенлер чемпиону, бизин районну спортчуларыны арасында спортну биринчи устасы; Къарабудагъ Къарабудагъов – авур атлетикадан спортну устасы, Дагъыстанны бир нече керен чемпиону, Зубайру Магьамматов – фехтованиеден Дагъыстанны спортуну биринчи устасы; Магьаммат Ягьияев – авур атлетикадан СССР-ни спортуну устасы, РСФСР-ни 1949-1950-нчи йылларыны чемпиону; Казбек Къурбанов – самбодан Дагъыстанны спортуну биринчи устасы, бир нече керенлер чемпиону; Зиявутдин Расулов – авур атлетикадан халкъара ярышны алдынлысы, спортну устасы; Абузагьир Исрапилов – Дагъыстанны ва Россияны авур атлетикадан чемпиону.

1968-нчи йыл бизин футболистлерибизни командасы Дагъыстанны юртлу футбол командаларыны арасында чемпион болгъан. Шондан сонггъу йылларда бизин район республикабыз булан бирче бизин ерли уланларыбызны уьстюнлюклери булан оьктем болуп турдукъ. Спортну ат къазангъан устасы, тутушуп ябушувдан Олимпия оюнланы чемпиону Магьамматгьасан Абушев; Европаны чемпиону, боксдан Олимпия оюнланы гюмюш призёру Нюрмагьаммат Шанавазов; тутушуп ябушувдан ва восточный (гюнтувуш) бире-бир тутушуп ябушувдан дюньяны чемпиону Шамил Абдурагьимов; тутушуп ябушувдан яшёрюмлени арасында Европаны ва дюньяны чемпиону Дарсан Жапаров; тутушуп ябушувдан Азияны чемпиону Магьамматали Гьажилавов, ДР-ни яшёрюмлерини биринчилик учун оьтгерилеген ярышларыны бир нече керен алдынлысы ва СНГ-ни биринчилик учунгъу ярышларыны алдынлысы Будун Муталимов ва башгъаларыны уьстюнлюклери булан биз айрыча оьктем болабыз.

Бугюнлерде Къарабудагъ­гент районда яшлар ва яшёрюмлер учун 10 спортшкола иш гёре. Шоларда 120 тренер ишлей, оланы 2-си – спортну ат къазангъан усталары, 2-си – халкъара класыны спортуну усталары, 11-си – спортну усталары. Олар 3460 яшны спортну гьар тюрлю жураларына уьйрете. Олай да, 9 муниципал ва бир республика ДЮСШ бар. Бирче алгъанда бизин районда 3700 яшёрюм спорт булан машгъул, шо районда яшайгъанланы 44 проценти болуп токътай.

Завур Умаракъаев, районну спорткомитетини председатели