Газетлеге язылывну, яшланы ял алывуну масъалаларына къаралды
Гьаманда йимик, гетген талатгюн район администрацияны гезикли аппарат жыйыны оьтгерилди. Жыйында районну башчысы М.Амиралиев, районну башчысыны биринчи орунбасарлары, администрацияны бёлюклерини ёлбашчылары, юртланы башчылары, райцентрда иш гёреген къурумланы, идараланы ёлбашчылары ортакъчылыгъын болдурдулар.
Чараны гиришив сёз булан районну башчысы М.Амиралиев ачды ва юрютдю. Магьмут Гьюсейнович оьзюню къысгъаракъ сёйлевюнде залдагъылагъа къаралажакъ масъалаланы малим этди.
Июль айны 21-нде болгъан жыйында 2020-нчы йылны экинчи яртысына республика ва «Районну яшаву» деген район газетге язылывну барышы, яйлыкъ каникулланы вакътисинде яшланы ял алывун болдурмакъ учун районну территориясында ерлешген ял алагъан лагерлени яшланы къабул этме гьазирлигине тынглады.
Бу масъалалагъа байлавлу районну башчысыны биринчи орунбасары Агьмат Гьажиев маълумат берди.
Агьмат Гьажиев 2020-нчы йылны экинчи яртысына республика, «Районну яшаву» район газетлеге язылывну барышы гьакъда айта туруп, йылны экинчи яртысына язылыв кампания осал экенин ташдырды.
«Районну яшаву» район газет– «Къарабудагъгент район» муниципал районну печат къуралы. Газетни иши район администрацияны янындан этилеген субсидия харжлар, язылывгъа топлангъан акъча маялар булан амалгъа геле.
«Район газет районну гюзгюсю» деп негьакъ айтылмай. Ватандашлар газетни бетлеринден таба гьар тюрлю тармакъларда этилеген ишлер булан таныш бола. Барыбызгъа да белгили кюйде, артдагъы эки йылны ичинде районда федерал, республика милли проектлеге къошулуп савлукъ сакълав, ёлланы, юртланы орамларын онгарывда, ерлерде ватандашлагъа ял алагъан ерлер болдурувда, ватандашланы ичеген таза сув булан таъмин этивде зор ишлер этиле. Районну ичинде юрюлюп турагъан ишлени ватандашлар район газетни бетлеринден таба охуп билелер.
Газет районгъа, халкъына маълумат къурал гьисапда тарыкъдан къайры да, район администрацияны къарарлары, оьзге ихтияр актлары, район Жыйыныны депутатларыны сессиялары, оларда бюджетге этген алмашынывлар, оьтгерилеген аукционлар ва оьзгелери газетни бетлеринде басмадан чыкъгъан сонг гючге гире.
«Районну яшаву» район газетге 2020-нчы йылны экинчи яртысына язылывну барышы гьакъда айта туруп, оратор буссагьатгъы вакътиге муниципал къурулувларда 2246 адам язылгъанын эсгерди. Районда адамланы санаву 86 мингден оьтген. Районда 4500 адам бюджет идараларда ишлей.
Бу йылны экинчи яртысына район газетге язылывну къурумлу оьтгеривде юртланы башчылары, школаланы директорлары, идараланы ёлбашчылары жавапсыз янашгъанын яшырмады.
А.Гьажиев оьзюню сёйлевюнде газетге борчлары бар идараланы, муниципал къурулувланы атларын да малим этди.
Районну башчысыны 1-нчи орунбасары А.Гьажиев язылывну гьакъында сёзюн тамамлай туруп, юртланы башчыларын, идараланы ёлбашчыларын, школаланы директорларын берген тапшурувлагъа жаваплы янашма, район газетге язылывну гьайын этме чакъырды.
Районну башчысыны 1-нчи орунбасары А.Гьажиев яшланы яйлыкъ ял алывуну гьакъында айта туруп: -Эпидемиология гьал яйлыкъ савлукъ-сакълав лагерлени ачылывуна болушлукъ этмей, амма районну территориясында ерлешген лагерлерибиз «Анжи-мастер», «Лотос» ва оьзгелери яшланы къабул этме гьазир. Тек, Роспотребнадзор лагерлени август айны 7-си болгъунча ачма ихтияр бермей. Ондан сонг да, 3 гюн тестден чыкъма тарыкъ. Лагерлер ачылса да, бир потокгъа ишлежек, шогъар да инанып битмейбиз,- деди А.Гьажиев.
Чарада гьасил чыгъарып сёйлей туруп, районну башчысы М.Амиралиев жаваплы ёлдашлагъа 10 гюнню ичинде республика ва район газетлеге язылыв масъалаланы бегитме къатты тапшурувлар берди.
Ондан къайры да муниципал пляжда ял алагъанлагъа онгайлыкълар, тазалыкъны болдурма, къошум контейнерлер салма, сувну масъаласын чечме жаваплы ёлдашлагъа тапшурулду.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
