«Гюнню янгылыкълары»

Чарагъа гёре, алдын ерли къурулуп «Новости дня» деген газетлени ва журналланы выставкасы гьазирленген эди. Китапхананы актив охувчулары журналлар ва газетлер булан чараны ортакъчыларын таныш эте туруп, олагъа язылмагъа, ана тилде чыгъагъан газетлени ва журналланы якъламагъа чакъырды. Сонг сёйлеген юрт китапхананы ёлбашчысы А.Изиева къумукъ газетлени ва журналланы ролю гьакъда хабарлады. Сёйлевюн тамамлай туруп, ол юртда абур ва сый къазанма бажаргъан, ишни ветераны Сакинат Давутовагъа «Районну яшаву» деген газетни гьакъында айтмагъа сёз берди.

-Районну яшаву» газетни мен ­оьтесиз кёп сюемен ва бир номерин де къутгъармай охуйман. Газетни мени савлай коллективим ала ва кёп сююп охуй, ону гелмеклигин къаравуллай. Газетден таба биз районда юрюлюп турагъан кёп ишлени, чараланы гьакъында билебиз, англайбыз. Газетде ишлейгенлени гьаракаты гёрмекли, олагъа Аллагь рази болсун! Олар бизге райондагъы бары янгылыкъланы билдирме гьаракат эте. Озокъда, артдагъы вакътилер интернет кёп къоллана. Болса да, газетде охугъан гьар тюрлю тарбия макъалалар, тюрлю маълуматлар башгъача таъсир эте, узакъгъа эсде къала. Биз газетге 2-нчи яртысына да язылгъанбыз, заманында газетибизни бизге етишдирсе…

Газет бизге бек тарыкъ, гьар тюрлю масъалаланы билме сюебиз. Гертиден де, район газетибизни бетлеринден кёп тюрлю маълуматланы, районну юртларында гьар тюрлю тармакъларда оьтгерилеген ишлени гьакъында билебиз.

Тек артдагъы вакътилерде яшлар учун чыгъарылагъан «Яшланы бокъчасы» деген бёлюк бек сийрек чыгъагъан болгъан, район газетни къуллукъчулары шо ишни узатса, яшлар ва уллулар учун судокулар, кроссвордлар чыгъарса, дагъы да арив болар эди, — деди ол. Чараны тамамлай туруп, ону ортакъчылары газетлени ва журналланы выставкасына къарап чыкъды.