Агьамиятлы масъалалагъа къаралды

Жыйында эки аслу масъала арагъа салынып ойлашылды:

Биринчи масъала – районда сугъарыв сувну масъаласы.

Экинчи масъала – налогланы жыйылыву.

Биринчи масъалагъа байлавлу болуп, ДР-ни «Минмелиоводхоз» ФГБУ-ну бизин райондагъы филиалыны ёлбашчысы Казбек Гьамзатов баянлыкъ берди.

К.Гьамзатов оьзюню сёйлевюнде 2020-нчы йылда районну юрт хозяйство продукталар болдурувчулары сугъарыв сувну къытлыгъын сезегенни яшырмады. Йыл къургъакъ ва яллавлу барагъанны, ерли булакъларыбызны, «Бекенез» булакъны суву хыйлы аз болгъанын эсгерди.

Сугъарыв сув булангъы масъала айрокъда, районну лап къыбла боюнда ерлешген уллубийавуллу юрт хозяйство продукталар болдурувчулагъа итти токътагъан. КОР булан гелеген Солакъ оьзенни суву Уллубийавулгъа таман даражада етишмейгенни ол яшырмады.

Казбек Гьамзатов насослар къошулгъанда КОР-ну сувун ахыр точкагъа, мунда уллубийавуллулагъа етишдирмек учун оьзю ёлбашчылыкъ­ этеген коллективни уьюрлери гьавузланы бир йимик ачып ёрукълаш­дырса да, Къурбуки, Къарабудагъгент юртланы сув къоллавчулары гьавузланы ачып, бютюн сувну бакъдырып, низамны бузагъанын аян этди. Докладчы оьзюню сёйлевюнде юрт хозяйство продукталар болдурувчулар къоллагъан сувгъа гьакъ тёлеме сюймейгенин де эсгерди.

- Сувгъа да оьзге хамалгъа йимик гьакъ тёлеме тарыкъ.

Солакъ оьзенни сувун бизин районну ахыр точкасына етишдирмек учун кёп электрик гюч харжлана. Харжлагъан электрик ярыкъгъа гьакъ тёленмей, борчдан-борч артып юрюй,-деди К.Гьамзатов.

Районда сугъарыв сувну масъаласын ёрукълу чечмек, къыш айларда ерли булакъларыбызны сувун, ташыгъан сувланы жыйма, тарыкъ болгъанда къоллама, юрт къурулувланы топуракъларында 15 кёл къурма гёз алгъа тутулгъанын, документ кагъызланы онгарыв ишлер юрюлегенни эсгерди. К.Гьамзатов бу йыл районну муниципал къурулувларында этилген ва этилип турагъан ишлени гьакъында да маълумат берди.

- Бу йыл умуми алгъанда районда 10 миллион 800 минг манатны къадарына иш этме тарыкъбыз,- деди ол.

Арагъа салынып ойлашылгъан сугъарыв сувну айланасында тувулунгъан масъалаланы, демек, къоллагъан сувну гьагъын жыйма Къурбуки, Къарабудагъгент юртланы башчыларына къатты тапшурувлар берилди.

Уллубийавул юрт муниципал къурулувну вакили жыйында: КОР-да сув нече гюн болажакъ?”- деген соравну берди.

Районну башчысы М.Амиралиев, -Сув КОР-да 20 гюн болажакъ, сугъарыгъыз, тек сиз де къоллагъан сувну гьагъын тёлеме унутмагъыз,- деди.

Районну башчысы М. Амиралиев ерлерде къурма гёз алгъа тутгъан кёллени ДР-ни “Минмелиоводхоз” ФГБУ-на бермек учун, районну топуракъ ва мал-матагь къурумуну ёлбашчысы С.Халиловгъа тарыкълы кагъызланы онгарывну чалтлашдырмакъ учун тапшурув берди. Бу масъаланы яшавгъа чыгъармакъ учун юртланы башчыларына да жанланма тарыкъ­лыгъын англатды.

Районну башчысы М. Амиралиев залдагъыланы районну консолицированный бюджетини 2020-нчы йылны биринчи яртысында толуву гьакъда таныш этди. Пандемия себеп болуп, районда тувулунгъан авур гьалгъа да къарамайлы, налогланы жыйыв тийишли даражада экенин эсгерди.

Масала, НДФЛ-ни толуву – 106; ЕСХН – 86; УСН – 119 – 119; топуракъ участкалагъа ижара гьакъ тёлев – 110 процент.

М.Амиралиев ерли налогланы, топуракъ, мал-матагь налогланы жыйывну артдырма тарыгъын аян этди.

Чарада транспорт налогну айланасында да кёп сёз юрюлдю. Транспорт налогдан 274 миллион манат борч бар. Районну башчысы М.Амиралиев сёйлевюн узата туруп, алда биз жыйылгъан транспорт налог къайда гетегенни билмей эдик. Гьали район жыйгъан транспорт налог районгъа геле. Къайсы юрт нечакъы транспорт налог жыйгъан буса, шо акъчаны шо юртгъа беремен. Шо акъчагъа орамланы онгарма ихтияры бар.

Чарада районну башчысы М.Амиралиев транспорт налоггъа топлангъан борчланы жыймакъ учун юртланы башчыларына, идараланы ёлбашчыларына, школаланы директорларына тапшурувлар берди.

Сёзюн тамамлай туруп, районну башчысы М.Амиралиев бюджетни гелим гесегин толтурувда юртланы башчыларын жаваплы янашма бирдагъы керен чакъырды.