Янгыз бир къуллукъну иши тюгюл

Ёлларда болагъан хатабалагьланы къоркъунчлугъуна янгыз автотранспорт себеп болуп къалмай, ёлларыбызны гьалы, ёл юрюшлени ортакъчыларыны низамсызлыгъы да себеп бола. Ёл юрюшню низамын болдурувда, ёлларда болагъан хата-балагьланы алдын алывда янгыз ГИБДД-ни къуллукъчуларыны иши болуп къалмай, юртланы башчылары, оьзге къурумланы вакиллери де ёл юрюшню ортакъчыларыны савлугъуну, аманлыгъыны гьайын этме, ёлларыбызны тийишли даражада сакълама тарыкъ бола.

Районда ёл юрюшню къоркъунчсузлугъун болдурмакъ муратда хас комиссия къурулгъан. Комиссияны уьюрлери оьзлеге берилген ихтиярлагъа гёре районну территориясында ёл юрюшню къоркъунчсузлугъун болдурувну чараларын гёрелер.

Июль айны 8-нде «Къарабу­дагъгент район» муниципал районну администрациясында ёл юрюшню къоркъунчсузлугъун болдурагъан комиссияны жыйыны болду.

Жыйынны районну башчысыны къоркъунчсузлукъгъа жавап береген орунбасары М.Зугьумов ачды ва юрютдю.

Жыйында районну территориясында ёл юрюшде бу йылны оьтген 5 айыны ичинде болгъан хатаба­лагьланы гьакъында районну ОГИБДД-ни ёлбашчысыны борчларын кютеген А.Къурбанов маълумат берди. Ол оьзюню сёйлевюнде 2020-нчы йылда гьисап берив болжалда ёлларда болагъан хатабалагьлардан гечингенлени санаву кемилгенни, адамлар оьтеген юрюш ёлларда тёбечиклер этме таклиф этди.

А.Къурбанов сёзюн узата туруп, оьрюм яшланы, охувчуланы арасында профилактика ишлер оьтгеривню агьамиятлыгъын да англатды, таклиф этди.

Жыйында сёйлеген районну ­ би­лим берив управлениесини­ начальнигини орунбасары М.Гьажи­магьамматов ёл юрюшлерде болагъан хатабалагь­ланы алдын алывда, профилактика этивде жагьиллени, жамият гьаракатланы уьюрлерин де къуршама таклиф этди.

Жыйынны гьасиллери гьакъда сёйлей туруп, районну башчысыны орунбасары М.Зугьумов ёл юрюшде къоркъунчсузлукъну болдурув ватандашланы, айрокъда, яшланы, ­оьрюм яшланы савлугъуну гьайын этив болагъанны эсгерди. Шо саялы ёл юрюшде къоркъунчсузлукъну, низамны болдурув – гьар ватандашны аслу борчу.