Меню
16+

Сетевое издание «Будни района»

10.07.2020 08:58 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Сюювню ва сююнчню ери

Автор: Нюрсагьадат Изамутдинова

Алдын да, гьали де бары да халкъ учун инг де биринчи ва аслу ер деп агьлю гьисаплана. Агьлю аралыкълар, яшлар, ата-ана бизин учун гьаманда да биринчи ерде токътагъан. Ол бизин учун инг де сыйлы ерлени бириси. Белгили кюйде, агьлюде болмаса ярамайгъан зат – о сююв, сюювсюз агьлюню къурма да къыйын, къурса да сакълама да бажарылмай.

Агьлюдегилер бир-биревню сюйме, абур этме ва амин болма тарыкъ. Сююв, инамлыкъ ва аминлик агьлюдеги насипге кюрчю болуп токътайгъаны ачыкъ.

Татывлу ва къатты агьлюде сююнч де, шатлыкъ да яшай. Бизин барыбыз да учун агьлюдегилени сюювю ва сююнчю бек агьамиятлы. Гьалиги девюрде агьлю къуруп яшама сюймейгенлени санаву арта барагъаны саялы, адамланы арасында герти гьислер кемимесин деп, Агьлюню, сюювню ва аминликни гюнюн байрам гьисапда белгилеме башлады. Шо гюн агьлюдегилер бир-бирин къутлай, агьлю насип ёрай, байрамны шатлыкъда белгилей.

Агьлюню, сюювню ва аминликни гюню байрам гьисапда 2008-нчи йылда, демек, «Агьлюню йылында» белгиленме башлады. Агьлю яшгъа да, уллугъа да якълав болуп токътай, олагъа аналыкъны ва аталыкъны насибин савгъат эте.

Татывлу, насипли агьлюде тувгъан, оьсген яшлар бизин уьлкебизни уьстюнлюклеге элтип, ону оьсювюне айрыча таъсир эте. Агьлю къыйынлыкъланы ва авурлукъланы, тюрлю масъалаланы бирче чечип, сюювню, гертиликни сёнме къоймай сакълап бажара.

Шолай агьлюлер бизин Къарабудагъгент районда кёп бар. Уьч-дёрт ва дагъы да кёп яшны тарбиялап ­оьсдюреген, олагъа билимли болма кёмек этеген ата-ана, озокъда, макътавгъа лайыкълы. Агьлю, аналар ва яшлар гьаманда гьукуматны якълавуну тюбюнде. Яшланы тарбиялав, оланы гьайын этив ата-ананы инбашына тенг бёлюне. Ишлеп болагъан чагъына етишген яшлар буса ата-анасына къарама, оланы гьайын этмеге борчлу.

Агьлюню гюнюне багъышлангъан байрамны «За любовь и верность» эсделик медалы да бар. Медальда сюювню белгиси гьисапланагъан ромашка чечек бар.

Бары да районлуланы агьлюню, сюювню ва аминликни гюню булан къутлай туруп, сизге татывлукъ, аминлик ва парахат яшав ёрайбыз.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

2