Разилик концерт
Алдагъы гюн, июль айны 7-нде, Гь.Гьамзатовну аты къоюлгъан янгы ачылгъан паркны территориясында коронавирусну пандемиясы саялы оьтгерилмей къалгъан Яшланы якълавну Халкъара гюнюне ва шо инфекция булан уьч айны узагъында ябушгъан медицина къуллукъчулагъа разилик билдире туруп, белгили йыравларыбызны ортакъчылыгъы булан къаравчулагъа гьавайын концерт гёрсетилди.
Барыбыз да билеген кюйде, бизин районну докторлары уьч айны узагъында коронавирус инфекцияны яйылывуну алдын алмакъ муратда бары да гючюн салып, оьзлерден болагъан кёмекни этдилер.
Шо гюн оьтгерилген концертде айтылгъан йыравларыбыз Рукъуят Сатыбалова, Аскендер Исрапилов ва ерли йырав Зайира Гьасанбекова сайламлы йырларын савгъат этди.
Айрокъда, байрам чарагъа гелген уллулагъа ва гиччилеге пегьливанчы Элзиман Агъабеков гёрсетген гьюнерлер къаравчуланы къурчун къандырды.
Эсгерилген янгы паркда яш да, уллу да арив ял алдылар.
Шо гюнгю чарада Къарабудагъгент район администрацияны аппаратыны ёлбашчысы Жамалутдин Имакъов, районну социал-сиясат управлениесини ёлбашчысы Гюлжанат Темирова, маданият, яшёрюмлеге ва туризмге къарайгъан бёлюкню ёлбашчысы Найида Мурзаева ортакъчылыкъ этди.
Концертни гимназия школаны охувчу къызы Дайгьанат Умалатова ачды ва юрютдю, сонг да медицина къуллукъчуланы атына йыр багъышлады.
Концертге гелген яшлар гьар тюрлю конкурсларда ортакъчылыкъ этди ва олагъа юрт китапхананы къуллукъчулары савгъатлар тапшурду.
Оьтгерилген байрам – район Жыйыныны депутаты Магьамматгьанипа Абакаровну оьзюню юртлуларына этген савгъат.
Чараны ортакъчылары яшланы, уллуланы сююндюрмек учун этилген байрам саялы оьзлени атындан баракалла билдирди.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
