Баъли байлыкъ…

Уьлкеде болгъан демократия алмашынывланы терс таъсири къайсы тармакъгъада тиймей къалмады. Шонча арив, гёзел, мол тюшюм береген бавларыбыз къаравсуз, къуллукъсуз къуруп тюпгючлеге айлангъанда, хыйлыланы юреги авуртмай къалмагъандыр. Девюрню алмашынывларына къаршы туруп болагъан гюч ёкъ.

Алда бахчагъа-бавгъа таш ташлай эдик буса, гьали ташланы жыягъан, емиш тереклер орнатагъан, районда бавчулукъ тармакъны оьсдюрювню гьайы этилеген заман гелген.

Артдагъы йылларда районда бавчулукъ тармакъны оьсдюрювде яхшы гьаракат этилди. Буссагьатгъы вакътиде районда 1206 гектар майданда емиш бавларыбыз бар. Шо участкаланы 638 гектары планлы кюйде тюшюм бере. 568 гектар – яш бавлар.

Тюшюм берме башлагъан бавларыбызны 130 гектары – баъли бавлар. Бугюнлерде ерлерде, айрокъда Къарабудагъгент муниципал къурулувну топуракъларында баълини мол тюшюмюн къайтарыв жанлы бара.

Буссагьатгъы вакътиде 116 гектардагъы баъли бавну емиши жыйылгъан. Республиканы базарларында, уьлкени оьзге регионларына 1438 тон баъли йиберилген.

Гьар гектар орта гьисапда 127 центнер тюшюм бере. Мунда охувчубуз шолай оьр тюшюм болуп болагъан зат тюгюл деп шеклик этме бола. Маълумат берейик: бавларыбызны авадан яны – интенсивный къайдада чачылгъан тереклер. Бу къайдада орнатылгъан участкаларда мердешли кюйде орнатылгъан бавлардан эсе тереклени санаву бир нече керенге артыкъ ва тюшюмю де мол.

Районда баълини арты булан кюрегени тюшюмюн къайтарыв башлангъан. Бу йыл кюрегени тюшюмю мол. Буссагьатгъы вакътиде 28 гектар ердеги бавланы тюшюмю къайтарылгъан, 218 тон кюреге сатывгъа йиберилген.

Фермерлер А.Сайитовну, И.Аба­каровну , А.Гьажихановну ва оьзге ёлдашланы участкаларыны тюшюмю яман гёрюнмей. «Баъли бай­лыкъ, бир айлыкъ» деп негьакъ айтылмай. Бугюнлерде бары да гьаракат тюшюмню тас этивсюз къолгъа алывгъа бакъдырылгъан.