Меню
16+

Сетевое издание «Будни района»

10.07.2020 09:09 Пятница
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Авур шартларда ...

Автор: Шихав Къайирбеков

Оьзге ерлерде йимик, бизин районда да 2020-нчы йылны тюшюмю учун чачылгъан гюзлюк, язлыкъ къылчыкълы ашлыкъланы тюшюмюн къайтарыв ерлерде массовый кюйде юрюле. Районда бу йылны тюшюмю учун 14199 гектарда къылчыкълы ашлыкъларыбыз бар. Авлакъчылар, механизаторлар ашлыкъ къайтарыв ишге комбайнланы, оьзге техниканы заманында онгарма, гьазирлик линейкагъа салма имканлыкълар болдуму экен? Районда ашлыкъ къайтарывгъа, тюшюмю алынгъан тарлавланы саламын къысагъан прес подборщиклер, автотранспорт етишеми?

Районда ашлыкъ къайтарыв компанияны барышы гьакъда районну юрт хозяйство управлениесини начальниги Шагьабутдин Мустапаев булай деди:

- Айтма тарыкъ, авлакъчыларыбызны, механизаторланы къайратлы загьматы булан гьар йыл районда кёп майданлагъа гюзлюк, язлыкъ ашлыкълар чачылагъаны, топуракълар ишлетилегени юрекни къувандырмай болмай. Оьрде де эсгерилип гетгеник йимик, 14 минг гектардан да къолай майданларда ашлыкъларыбыз бар. Эсгерме тюше: чачывлар агротехника гёрсетеген болжалларда оьтдю. Чачывларыбызны чыгъывуна да багьана ёкъ эди. Тек, гёресиз, язбашны чагъы нечик къургъакъ гетди. Яйыбыз да яллавлу бара.

Яйны яллавлу гюнлери. Чакъны иссилиги башынгны майын къайната. Шо четимликлеге де къарамайлы, ерлерде къылчыкълы ашлыкъланы тюшюмюн къайтарыв къурумлу кюйде юрюле деп айтма боламан.

Ашлыкъланы тюшюмюн къайтарывда районда умуми алгъанда 32 комбайн, таман даражада автотранспорт къуршалгъан.

Ашлыкъ къайтарыв башлангъынча, от тюшювлени алдын алыв чаралар да гёрюлдю ва шо гьаракат гьали де давамлы кюйде узатыла.

Айтагъаным, ашлыгъы къайтарылагъан тарлавланы башында сув бочке булан трактор яда сув ташыйгъан автомашин, артына сабан тиркелген трактор токътап тура.

Ерлерде ашлыкъ къайтарыв компания къурумлу ва жанлы юрюле.

2020-нчы йылны тюшюмюн къайтарыв Къурбуки, Губден зонада, Къакъашура, Къарабудагъгент, Гьели юрт муниципал къурулувларда яман гёрюнмей.

Алдагъы гюнлерде биз бу йылны тюшюмюн къайтарыв булан таныш болмакъ муратда авлакъчыланы янында болдукъ. Масала, Къакъашура юрт администрацияда оьзюне фермер Сахават Алчагъыров башчылыкъ этеген сабанчы фермер агьлюню 300 гектарда къылчыкълы ашлыкълары бар. Бугюнлерде шо участкада ашлыкъ къайтарывда 4 комбайн ишлей. Эки комбайнны Сахаватны уланлары ишлете. Ашлыгъы алынгъан тарлавлагъа дестине эки прес подборщик салам тайлар къысма гирише. Бир-бир ерлерде саламдан тазалангъан тарлавлагъа сюрюв агрегатлар, тракторлар сюрме башлагъан участкалар да бар.

2020-нчы йылны ашлыгъыны тюшюмюн къайтарыв Гьели юрт муниципал къурулувда да яман гёрюнмей. Оьзюне Магьамматсайит Абсаматов башчылыкъ этеген «Гьюсенов» деген сабанчы-фермер хозяйствосунда да къыставлу заманлар. Бары гюч авур шартларда болдурулгъан да тюшюмню тас этивсюз къолгъа алывда, беженлеге къотарывда гьаракат этиле.

Буссагьатгъы вакътиде районда умуми алгъанда 10564 гектардан къолай майданланы ашлыгъы басылгъан. Орта гьисапда 23050 минг тонгъа ювукъ ашлыкъ къайтарылгъан.

Гьасиллер гёрсетеген кюйде, авлакъчыларыбыз гектардан орта гьисапда 22 центнерге ювукъ тюшюм алалар.

Озокъда, шо натижалар оьр гёрмекли тюгюл буса да, гьава шартланы гьисапгъа алсакъ, яман да тюгюл.

Уьстевюне, ашлыкъгъа, саламгъа талап да бар. Ерине барып ала бусанг, будайны килосуну багьасы – 10, бир тай салам – 80-90 манат.

Мен бу санавланы эсгерегеним, юрт хозяйство производствода ишлеме бизин районну шартларында йылдан-йыл авур бола геле. Чагъыбызны да англап болмайбыз. Йылдан-йыл къургъакъ, исси бола, шо авурлукълагъа да къарамайлы, артдагъы 4-5 йылны ичинде авлакъчылыкъ булан машгъул болма сюегенлени санаву артып юрюйгени гележекге инамлыкъны тувдура-дей районну юрт хозяйство управлениесини начальниги Ш.Мустапаев.

Айтгъанлай да, районну авлакъчылары учун йыл авур гелди. Къургъакълыкъ, иссилик авлакъланы къурутуп битген. Авлакъчыларыбыз, механизаторлар табии шартланы авурлукъларына оьзлени касбу бажарывлулугъун, топлангъан бай иш сынавун къоллап оьсдюрген тюшюм яман гёрюнмей. Гьали шо тюшюмню тас этивсюз къолгъа алыв гьаракат юрюле. Хайырын гёрюгюз, эсен ашагъыз!

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3