Меню
16+

Сетевое издание «Будни района»

05.06.2020 08:57 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Яшлар – яшавну чечеклери

Автор: Калимат Элмурзаева

Июн айны 1-нде бары да ерлерде йимик, бизин районда яшланы якълавну Халкъара гюню белгиленди. Бу байрам бизге барыбызгъа да яшланы якълавну Халкъара гюню деп танывлу. Бизин уьлкебизде ол инг де эсги байрамланы бириси гьисаплана. Экинчи Дюнья давдан сонг яшланы савлугъуна ва яшавуна айрыча тергев берилме башлагъан. Шо сыйлы байрам 1949-нчу йылда Париж шагьарда оьтгерилген къатынланы Халкъара конгрессинде белгиленген болгъан.

Шолай, артындагъы 1950-нчи йылны, июн айыны 1-нде яшланы байрамы оьтгерилген. Шондан сонг Европаны, Азияны уьлкелеринде де 1-нчи июнда яшланы якълавну Халкъара гюнюн белгилеме башлагъан. Сонг шо гюнню символу – байрагъы да мекенли болгъан.

Байрамны СССР-ни заманында бары да уьлкелер якълагъан шатлыкълар булан оьтгермеге башлагъан.

Оьтгерилеген байрамны аслу мурады гиччи яшланы якъламакъ, оланы масъалаларына аслу тергев бермек болгъан. Бизин уьлкебизде яшланы байрамы Россиядагъы яшланы фондуну башчылыгъы булан оьтгериле.

Яшлар – бизин гележегибиз. Яшланы яшаву олагъа бакъгъан якъда уллуланы гьай этивюнден гьасил болагъаны белгили. Биз гиччи замандан берли оланы гьайын этмеге герекбиз.

Шогъар гёре де, яшланы якъламакъ, етишип болмайгъан, яшлары кёп агьлюлеге, етим къалгъан яшлагъа кёмеклешмек, оланы яшавунда ортакъчылыкъ этмек, къолкъошмакъ – уллуланы аслу борчларындан санала.

Гиччипавлар оьзлеге бакъгъан тергевню гьар гюн гьис этмеге тарыкъ. Оланы шат, чечекли яшаву, савлугъу– уллуланы къолунда. Яшлар биз оьзлени сюегенни, олардан гележекде кёп яхшылыкълар къаравуллайгъанны билмеге герек. Шо гюн шагьарланы, юртланы орамларында, бавларында шатлыкълар, концертлер оьтгериле.

Байрам гюн ишлемейген гюн деп белгиленмеген буса да, уллаталары ва улланалары яшланы байрамгъа, концертлеге алып чыгъа, олагъа гьар тюрлю татлиликлер ала, оланы сююндюре.

Тек яшланы арасында ата-анасыз оьсегенлери, чарасыз, етишип болмайгъан агьлюлерден чыкъгъанлары барны унутмагъа ярамай. Оланы да шо гюн гёнгю алынмагъа, олар да якъланмагъа тарыгъын бизге, уллулагъа, унутмагъа ярамай.

Давлар юрюлеген ерлердеги яшлар учун тюрлю ёлугъувлар, олагъа спонсорлукъ кёмегин болдурагъан, ашлар-сувлар булан оланы таъмин этеген ватандашлар да аз тюгюл.

1-нчи июнда, яшланы якълавну Халкъара гюнюнде сама да гьар уллу адам яшланы якъламакъны, олагъа нечик буса да кёмегин болдурмакъны гьакъында ойлашмагъа борчлу.

Яшлар шолай къыйын гьаллагъа уллулар саялы тюшгенин унутмагъа ярамай.

Биз «Яшланы яты болмай!» деген лозунггъа гёре ишлемеге тарыкъбыз. Бизин сюювюбюз де, тергевюбюз де олагъа янгыз байрам гюнлер тюгюл, гьар гюн бакъмагъа тарыкъ.

Яшланы байрам гюнюнде биз бары да яшлагъа таза ва ачыкъ кёк, насипли ва шат яшав, савлукъ ва узакъ оьмюр ёрайбыз.

Яшланы якълавну Халкъара гюнюне багъышланып бизин уьлкебизде ва районда кёп тюрлю конкурслар, выставкалар, гьар тюрлю спорт ярышлар, концертлер, рагьмулу акциялар оьтгериле эди. Бу йыл коронавирус инфекцияны яйылыву себепли болуп, яшланы якълавну Халкъара гюню бары да ерлерде онлайн режимде дистанция къайдада оьтгерилди. Шо гюн уллулар яшланы онлайн режимде байрамы булан къутлап, олагъа кёп тюрлю яхшылыкълар ёрады. Яшлар интернет порталда оьзлени къутлавларын, суратларын, охугъан шиъруларын салды. Олай да, Къарабудагъгент районну башчысы Магьмут Амиралиев бизин районну бары да яшларын байрамы булан къутлады. Олагъа яшавда къатты савлукъ, яхшы гьислер, сююнчлер ёрады. Уллулар яшланы гележегини гьайында турмагъа тарыгъын эсгерди.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3