Ватан давну ортакъчысы

Шо буса, бизин оьсюп гелеген наслулагъа дарс болуп токътай. Бу макъалабызда биз гьелили улан Агъав Мугьутдиновну гьакъында айтмагъа сюебиз. Агъав Мугьутдинов 1922-нчи йылда Гьели юртда тувгъан. Оьсюп, йыллары 18-ге етише туруп, намарт душман хапарсыздан Совет Элине чапгъын этген деген аччы хабар оьзгелени йимик Агъавну юрегине де от къуя. Арадан аз да гетмейли, 1942-нчи йылны август айында оьзге юртлу уланлар йимик ол да Армияны сыдраларына гете. Биринчи гюнлеринден тутуп Агъав Мугьутдинов душмангъа къаршы ябушувларда ортакъчылыкъ эте. Дав майдаларында ол 2 керен яралана. Яралары бютюнлей сав болгъунча да къарамайлы, Агъав оьзю къуллукъ этеген асгер бёлюкге къошулуп намарт душманланы Берлинге ерли къувалай. Дав майданларда гёрсетген къоччакълыкълары саялы Агъав Мугьутдинов давну 3 даражалы ордени «За боевые заслуги», «За победу над Германией», «За взятие Берлина» ва олай дагъы да бир нече медаллар булан савгъатлангъан. Уьстюнлюк алып ата юртуна къайтгъан сонг да, Агъав анадаш колхозун аякъгъа тургъузувда, юрт хозяйство тармакъда кёп загьмат тёкген. Ону шо загьматы да бошуна гетмеген, юртлуларыны арасында абур ва сый къазангъан. Шо саялы да, ону сураты юрт музейни ва культура къаланы тамларын безей.