Бирде унутмажакъбыз

Шо гюн бизин уьлкебизни тарихинде лап да къайгъылы ва талчыкълы давланы бири — Уллу Ватан дав башлангъан.

Немис-фашистлер оьзлени «Барбаросса» деген планына гёре, бизин уьлкебизни ёкъ этмеге сюе болгъан.

Шо гюн, июн айны 22-нде, эртен вакъти, бир зат да билмейген совет халкъны башына бомбалар тюшме башлай. СССР-ге къаршы шо давда Германияны яны болуп Румыния, Италия, Словакия, Финляндия, Венгрия ябуша.

Давну биринчи гюнлеринде немис-фашист елевчюлени асгерлери давгъа агьамиятлы объектлени ёкъ этмеге къаст эте.

Бизин уьлкебизни халкъы дёрт йылны узагъында юрюлген уллу ябушувларда миллионлар булан халкъын тас этген, шагьарларын, яллагъан, юртлары, заводлары ва фабриклери ёкъ этилинген.

79 йыл гетсе де, шо дав йылланы агъусу бизин халкъ­ны юреклеринден ва эсинден таймагъан ва таймажакъ деп эсиме геле.

Шо болгъан Уллу ватан давну агъусу бизин пачалыгъыбызны бары да ожакъларына гирген десек ялгъан болмас.

Къагьрулу ябушувларда кёп адамлар оьзлени ата-аналарын, къардашларын, уьягьлюлерин тас этген.

Айрокъда шо агьвалатны Уллу ватан давда ортакъчылыкъ этген ветеранлар, давну яшлары, тылда ишлегенлер унутуп болмай.

Июн айны 22-нде бизин уьлкебизни бары да шагьарларында ва юртларында оланы эсделигине минутлукъ шыплыкъ билдириле.

Гьар йыл эсделикни ва пашманлыкъны гюнюне багъышланып кёп тюрлю чаралар оьтгериле эди, тек бу йыл коронавирус инфекция булангъы гьал саялы кёп адамлар ортакъчы­лыкъ этмеди.

1992-нчи йылда бизин уьлкеде РФ-ни гьакимиятыны къарары булан Ватанны якълавчуларыны эсделигини гюнюн белгилеме башлады.

РФ-ни Президенти Б.Ельцинни 1996-нчы йылны июн айыны 8-ндеги 857 номерли къарары къабул этилинип, июн айны 22-нде эсделикни ва пашманлыкъны Гюню белгиленме башланды.

Шолай, июн айны 22-нде эсделикни ва пашманлыкъны гюнюне багъышлангъан митинг Къарабудагъгент юртда У.Буйнакскийни атындагъы ял алагъан бавдагъы Уллу Ватан давда жанын бергенлеге са салынгъан эсделикни алдында ­оьтгерилди.

Шо гюн оьтгерилген пашман чарада Къарабудагъгент юртну башчысы Магьамматсолтан Гьасанов, Къарабудагъгент район администрациясыны социал-сиясат бёлюгюню ёлбашчысы Гюлжанат Темирова, «Районну яшаву» газетни баш редактору Асадулла Гьажиев ва башгъалары ортакъчылыгъын болдурду.

Шо гюн район китапхананы къуллукъчулары эсделикни ва пашманлыкъны гюнюне багъышлангъан китапланы ва суратланы выставкасын оьтгерди. Пашманлыкъ митингде ортакъчылыгъын этгенлер эсделик монументге гюл байламлар салды ва давда къалгъанланы эсделигине багъышланып бир минутлукъ шыплыкъ билдирди.