Меню
16+

Сетевое издание «Будни района»

26.06.2020 09:26 Пятница
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Ашлыкълар орула

Автор: Шихав Къайирбеков

Бугюнлерде юртлу загьматчылары учун лап къыставлу заманлар. Ерлерде 2020-нчы йылны тюшюмю учун гюзлюк ва язлыкъ къылчыкълы ашлыкъланы тюшюмюн къайтарывгъа бютюнлей гиришгенлер.

Айтма тарыкъ, артдагъы йылларда районубузну территориясында гьава шартлар топуракъда доланагъан ашлыкъ оьсдюрювчюлерибизни ёнкютмей. Чакъ йылдан йыл къургъакъ ва исси гелегенин къайсыбыз да сезебиз.

Бизин якъларда лап тарыкълы вакъти язбашда янгурлар болмайгъаны бу биринчи йыл тюгюл. Районда чачылагъан гюзлюк ва язлыкъ къылчыкълы ашлыкълар къургъакъ топуракъларда ерлешдирилегенин гьисапгъа алсакъ, районну ашлыкъ оьсдюрювчюлери нечик авур шартларда тюшюм оьсдюрелер...

Къыйын гьава шартлагъа да къарамайлы районда йылдан-йыл кёп майданлагъа гюзлюклер чачылагъаны разиликни тувдурмай болмай.

“2020-нчы йылны ашлыгъыны тюшюмюн къайтарывгъа ерлерде гьазирлик нечикдир?”

Бу соравну биз районну ­ашлыкъ къайтарывчуларыны янына узатагъан, районну юрт хозяйство управлениесини баш агроному Магьамматшапи Абдулвагьаповгъа беребиз. Ол сёйлевюн булай башлады:

-Бизин район республикада лап уллу райондан къайры да хыйлы майданлагъа ашлыкълар чачылгъан район да дюр. Артдагъы йылларда юрюлген англатыв ишлер натижа бере. Районда топуракълар йылдан-йыл кёп ишлетиле. Юзюм, емиш бавлар, овош, оьсюмлюклер, ем культуралар чачыла.

2020-нчи йылны тюшюмю учун районда умуми алгъанда 14200 гектаргъа гюзлюк ва язлыкъ къылчыкълы ашлыкълар чачылгъан.

Материалны ичинде де эсгерилгени йимик, авлакъчыларыбыз ашлыкъланы тюшюмюн авур шартларда оьсдюрелер. 3-4 ай кёкден чыкъ тюшмейген йыллар бола. Бу йыл да шолай йылланы бири. Нечакъы бола буса да авур йыл.

Районну ашлыкъ оьсдюрювчюлерини арасында табиатны авурлукъларына оьзлени касбу бажарывлугъун, иш сынавун къоллап агротехника къуллукъланы тюз кютюп яхшы тюшюм алагъанлары да бар.

Бугюнге районда бир минг гектаргъа ювукъ майданланы ашлыгъы къайтарылгъан. Гюзлюклени тюшюмюн къайтарывда буссагьат 20-дан къолай комбайн ишлей. Дагъы да 6-7 комбайн ашлыкъланы тюшюмюн къайтарывгъа гиришежек. Ашлыкъ ташыйгъан автотранспорт етише.

- Ашлыкъ къайтарыв кампаниягъа къайсы юрт муниципал къурулувда яхшы гьазирлик гёрюлген?

- Гюз чачывда йимик ашлыкъ къайтарыв кампанияда Къурбуки, Гьели, Губден юрт муницмпал къурулувларда жанлы юрюле. Къурбуки де оьзюне Магьамматзапир Нухов башчылыкъ этеген «Къурбуки» деген сабанчы-фермер агьлюню ашлыкъ къайтарывчулары «Салтабакъ» участкада ишлеп тура. Гьели юрт муниципал къурулувда да бу йыл­ны тюшюмюн къайтарыв жанлы юрюле деп эсгерме ярай. ­Оьзюне Магьамматсайит Абсаматов башчылыкъ этеген «Гьусейнов»-ну деген сабанчы-фермер агьлюню 450 гектарда ашлыкълары бар. Олар да 2020-нчы йылны тюшюмюн къайтарма гиришгенлер.

Айтма тарыкъ, КФХ «Къурбуки», КФХ «Гьусенов» авур шартлагъа да, къарамайлы участкаларыны тюшюмю бир къадар артыкъ. Себеп? Бу ёлдашлар гюзлюклер чачывда агротехника чараланы тюз юрюте. Урлукъ арив ял болгъан (чёрный пар) топуракълагъа чача, шо саялы да алынагъан гелимлер яман тюгюл,- деп сёзюн битдирди баш агроном.

Гертилей де, районда 2020-нчы йылны тюшюмюн къайтарыв къурумлу башланды. Шо иш бугюн, тангала къакъашуралы айтылгъан механизатор Сахават Алчагъыровну авлакъларында да башланажакъ.

Ашлыгъы къайтарылгъан тарлавлагъа саламны тайлагъа къысагъан прес-подборщиклер гире. Ашлыкъ къайтарывчулар от тюшювлерден де сакъ болма тарыкъ. Комбайнлени, автомашинлени от сёндюрювде къолланагъан биринчи алатлары, огнетушителлери болма тюше. Тек от тюшювлени алдын алывда кемчиликлер ёкъ деп айтма къыйын.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

2