Овош тарлавларда

Шо саялы да болма ярай, артдагъы йылларда районда ачыкъ топуракъда ерлешдирилген овош тарлавланы майданлары йыл сайын генглеше.

Овошчулукъну гьакъында сёз юрюте туруп, мунда булай затны айрыча эсгерме тийишли гёребиз. Демек, гьалиден бир-эки йыл алдын ­ачыкъ топуракъда овошлар ­оьсдюрюв, къуллукъ этив булан янгыз топуракъда айрыча доланагъан ватандашлар, ЛПХ-лар машгъул бола эди буса, гьали КФХ-ларда овошлар оьсдюрме гиришгенлери бар.

2020-нчы йылны тюшюмю учун бу йыл районда 478 гектаргъа овош оьсюмлюклер орнатылгъан. Шо топуракъланы 50 гектарына сабанчы-фермер агьлюлер ИП-лер орнатгъан.

Бугюнлерде районну овош тарлавларында загьматны зангы къайнай. Овошчулар овошланы чёп отлардан къорув, аврувланы, зиянлы жанланы алдын алыв чараланы оьтгерип туралар. Сугъарыв ишлер узатыла.

Овошчулар овошлар болдурувда сугъарыв сувну эконом этмек муратда алдынлы къайдаланы генг кюйде производствогъа гийиривню гьаракатын эте.

Районну топуракъларына орна­тылгъан овош, бахча оьсюмлюклени 80 процентден къолайы – тамчы къайдада сугъарылагъан участкалар. Этилген къуллукълагъа гёре тарлавларда овошланы тюшюмю мол гёрюне. Овошчулар ачыкъ топуракъгъа орнатылгъан хыярны, гьабижайны тюшюмюн къайтарма, сатывгъа чыгъарма урунгъанлары бар.

Агъулу дарманланы, ягъарлыкъ майлав-материалланы багьаларына къарагъанда, адамны къол къыйыныны багьасы ёкъ. Демек, бир гектар овош тарлавну бир керен аврувлардан, зиянлы жанлардан къоруп сакъламакъ учун 8-10 минг манатгъа агъулу дарманлар чачма тарыкъсан. 10 минг манат акъчаны тирилтмек учун овошчу буссагьатгъы багьалагъа гёре 4 тон хыяр сатма тарыкъ. Юрт хозяйствода шулай авурлукълар кёп ёлугъа.