Хантав турма ярамай
«Чананы къышгъа язда онгар, арбаны къышда онгар» деген айтывгъа гёре, бугюнлерде ерлерде гьайван-малгъа къатты сувлу емлер топламакъны гьайын этеген заман. Айтма тарыкъ, артдагъы йылларда районда ем топлав авур шартларда оьте. Айтагъаным, чагъыбыз йылдан-йыл къургъакъ ва яллавлу геле. Табии отлавлукъларда отну массасы осал, ем учун чачылгъан кёп йыллыкъ отланы сугъармакъ учун да сув етишмейген гезиклер аз болмагъан. Шо себепден 4-5 керен чалма болагъан люцерна тарлавларыбыз 2 керен, лап кёп чалынса, 3 керен чалынып къала.
Табии авурлукъланы тилсиз гьайван не англасын, огъар къышда отлукъ емден толуп болсун. Районда 2020-нчы йылда гьайванлагъа ем топлавну барышы нечикдир? Бу соравгъа жавап излей туруп, алдагъы гюн биз районну юрт хозяйство управлениесини баш зоотехниги М.Алиев булан Гьели юрт муниципал къурулувну ем топлавчуларыны янына барайыкъ, иш уьстде гьалны гьакъыкъатын билейик деп, ёлгъа чыкъдыкъ. Чакъ шайлы исси. Уьстевюне, ел де эшмей. Бизин машин узун аркъадан гётерилгенде, чачылгъан къылчыкълы ашлыкъ тарлавланы арасында оту чалынып, еми алынгъан участкалар ёлугъа. Эки де якъгъа къарай туруп, биз Гьели юрт администрацияны бинасына етишдик. Бинаны экинчи къабатына гётерилип, бизге тарыкълы адамгъа юртгъа гелмегибизни себебин англатдыкъ. Ол да янгы ишге тюшгенге гёре юртда ем топлавгъа байлавлу толу далиллер берип болмады. Районда ем топлавну гьакъында районну баш зоотехниги М.Алиев булай баянлыкъ берди.
Районда бар гьайван-малны токъ къышлавун болдурмакъ учун бизге 25 минг тон бичен, 13,5 минг тон салам ва 6,5 минг тон сенаж, умуми алгъанда, 45 минг тон къатты, 37 минг тон сувлу, 15 минг тон тири емлер тарыкъ. Бугюнлерде районну муниципал къурулувларында емлер топлав авур шартларда юрюле. Табии отлавлукъларда от осал, масса чыкъмай. Районда 30 от орагъан комбайн, 60 пресс-подборшик бар. Буссагьатгъы вакътиде 1835 тон къатты емлер, шону ичинде 970 тон бичен, 865 тон сенаж гьазирленген. Бу йыл эки хозяйство сенаж салгъанлар. Олар «КФХ Къурбуки»-700 тондан къолай ва КФХ Умаров – 100 тон.
Районну территориясында бизге таман даражада емлер топлама имканлыкълар ёкъ. Шо саялы районну фермерлери ем топлавну Бабаюрт – Къызларда гьазирлеп тура,- деди баш зоотехник. Бир зат ачыкъ: емлерден хантав турма тюшмей. Буссагьат бир тай биченни багьасы – 130-140 манат. Бу ёкълукъ булан емлени багьасы къышда нечакъыгъа гётерилегенин айтма къыйын. Гьали таман даражада ем топлагъан, емни гьайын этген фермер, гьайванчы парахат юхлама болажагъы гьакъ.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
