Меню
16+

Сетевое издание «Будни района»

11.06.2020 16:55 Четверг
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Моллукъ сувдан баш ала

Автор: Шихав Къайирбеков

Июн айны 7-нде бары да ерлерде йимик, бизин районну сугъарыв къурумну къуллукъчулары оьзлени касбу байрамын белгиледилер. Биз оланы байрамын къутлап, материал гьазирлеген эдик. Тек, район Жыйыныны депутатларыны сессиясыны материаллары арагъа чыгъып, заманында басмагъа берме болмай къалдыкъ. Мелиораторланы байрамы гетген буса да, макъаланы охувчуну тергевюне беребиз.

Ер юзюнде Тенгирибиз яратгъан адамурлукъ, жан-жанывар, оьсюмлюклер – бары да сув болмаса, топуракъ дымлы болмаса, яшап,оьсюп болмай. Адам ашсыз хыйлы гюнлер чыдама бола, сувсуз къыйын. Шо саялы да тюгюлмю, бырынгъы заманлардан берли адам яшавлукъ учун оьзенлеге, оьзге сув чыгъагъан ерлерге ювукъда бина тиге болгъанлар.

Сувну топуракъ учун агьамиятлыгъын айтып берме къыйын. Айрокъда, Дагъыстан йимик янгурлар аз болагъан регионларда, юрт хозяйство производствону гётермек, авлакълагъа чачылагъан оьсюмлюклерден мол гелимлер алмакъ учун, топуракъгъа чачылгъан чачывлагъа заманында сув берме болмаса, къыйын зая гетме, къайтарыш осал бола.

Пача тахдагъы девюрлерден берли уьлкеде топуракълагъа сув беривге, мелиорация ишлеге, техника къурулушлар къурувгъа агьамият бере болгъан. Июн айны биринчи къаттыгюнюнде Россияда мелиорацияны гюнюн белгилей.

Бизин районда иш гёреген сугъарыв къурумну къуллукъчулары оьзлени касбу байрамын ишде не йимик уьстюнлюклер булан къаршылайлар? Бу соравгъа жавап бере туруп, ДР-ни Минмелиоводхозну пачалыкъ унитар бюджет къурумуну бизин райондагъы филиалыны баш инженери Мурат Гьажиев булай маълумат бере: районну сугъарыв системасыны къурумуну тарихи макътавлу ва бай. Районда бу къурум иш башлагъанлы, мен хата болмай бусам, 84 йыллар бола. Башлапгъы заманаларда районну сугъарыв системасын аякъгъа тургъузувда Россиядан гелген касбучулар оьз къошумун этгенлер. Неге тюгюл, шо заманларда районда гидротехника тармакъда англаву бар касбучулар болмагъан. Россиядан гелип ишлеген касбучулар татавулларда юрюйген, авлакълагъа чыгъарылагъан сувну къадарын артдырмакъ учун ерли шартланы гьисапгъа алып, яхшы бажарывлукъ гёрсетип ишлегенлер. Олар булан янаша ишлей туруп, ерли адамлар да сынав топлагъанлар.

Давдан сонггъу йылларда уьлкени башын тутгъанлар халкъ хозяйствону аякъгъа тургъузмакъ учун, халкъны токъ яшатмакъ муратда юрт хозяйствону гётермек учун тергевню гючлендирген. Мелиорация ишлеге кёп харжлар гёрсетилме башлагъан.

Районда бар гидротехника къурулушлар, татавул башлар реконструкция этилме башлангъан.

Айтма тарыкъ, районну сугъарыв системасыны чечекленивю, огъар ёлбашчы болуп бажарывлу, талапчы,къатты иш низамы булангъы Гьамзат Давутович Гьамзатов гелген йыллардан баш ала. Ону гьаракаты, къурумчулукъ бажарывлугъу, талапчылыгъы булан районну сугъарыв системасында зор ишлер этилген. Материал-техника базасын беклешдиривде, къурумда ишлейгенлеге ял алма онгайлыкълар болдурмакъ учун Гьамзат этген ишлени эсли наслу яхшы биле.Къарабудагъгент сугъарыв системаны абзарындагъы гёзелликге, гьар техника саялы айры гаражлар, техникагъа ремонт этме бары да имканлыкълары, онгайлыкъ­лары булангъы устахана кёплени гьайранлыкъгъа къалдыра эди.

Районда буссагьатгъы вакътиде 184,2 чакъырым узунлугъу булангъы татавул, гьар тюрлю къадарда сув сыягъан ва жыйылагъан 12 кёл, 11 гьавуз баш бар. Бизин коллектив районда бар сувланы авлакълагъа чыгъармакъ учун татавулланы, кёллени ёрукълу сакълап, топуракъда доланагъанланы сугъарыв сув булан таъмин этме гьаракат этебиз. Яшырма тарыкъ тюгюл, районну ичиндеги ерли сувланы къадары артдагъы йыллар хыйлы аз болгъан. Уьстевюне, районда артдагъы вакътилерде чакъ йылдан-йыл къургъакъ геле. Шо саялы да бар сувланы асырап къоллап, татавулланы тазалап, бар сувланы бир тамчысын да зая этмей авлакълагъа етишдиребиз.

Буссагьатгъы вакътиде Манасгент татавул, Паравул юртда «Ана-тавул», Губден зонада «Жахала» герти татавуллар мукъаятлы кюйде тазаланып битген.

– Бизин коллектив алдын берли сыкълашгъан, бирликде-татывлукъда загьмат тёге. Коллективде тапшурувларына жаваплы янашагъан ёлдашлар аз тюгюл. Масала, татавуллагъа къарайгъан А.Амаров, У.Устарханов, М-наби Балашов, И.Парзаев ва оьзгелери шолайлардан санала,-деди баш инженер.

Бу йыл мелиорацияны къуллукъчуларыны касбу байрамы июн айны 7-сине рас гелди. Биз районну сугъарыв системасыны къуллукъчуларын гетген байрамын булан гьакъ юрекден къутлайбыз. Ишде уьстюнлюклер, агьлюлеринде татывлукъ, барлыкъ, къаркъараларына къатты савлукъ ёрайбыз. Сизге халкъны разилигин алып ишлеме насип болсун!

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

2