Меню
16+

Сетевое издание «Будни района»

29.05.2020 09:14 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Районгъа, жамиятгъа гьалал къуллукъ этип гетди

Автор: Шихав Къайирбеков

Ибашев Багьавутдин Зиявутдинович 1937-нчи йылда Къарабудагъгент районну Уллубийавул юртунда кёп яшлы агьлюде тувгъан. Къарабудагъгентдеги орта школаны битдирген сонг, ол 1954-нчю йылда Дагъыстан пачалыкъ юрт хозяйство институтну ветеринар бёлюгюне охума тюшген. Оьр билим алгъан сонг, Багьавутдин Ибашев районда гьар тюрлю жаваплы къуллукъларда намуслу кюйде ишлеген.

Оьр охув ожакъны битдирген сонг, Багьавутдин Ибашевни Осетия АССР-ни Моздок районуну Къызлардагъы ветеринар участкасына заведующийи этип бакъдыра. Бу къуллукъда жагьил касбучу бир йыл загьмат тёгюп, 1960-нчы йылда ата юртуна къайта ва колхозда 5 йыл ветеринар къуллукъда чалыша.

Оьрде де эсгерип гетгенибиз йимик, ол районда кёп тюрлю жаваплы къуллукъларда ишлеп гелген. Багьавутдин Зиявутдинович ветеринар врачны къуллугъундан башлап КПСС-ни район комитетини 2, 1-нчи секретарны къуллугъуна ерли гётерилген. КПСС-ни район комитетини 1-нчи секретары болуп 10 йылдан къолай ишлеп, районну экономикасын гётеривде, халкъны яшав даражасын яхшылашдырывда, ерлерде социал-экономика масъалаланы яшавгъа чыгъарывда аслам къошум этген ёлдашларыбызны бири.

Багьавутдин Ибашев районда хозяйстволаны, къурумланы ёлбашчысы болуп да ишлеп гелген. Ол къайда ишлесе де, къайсы къуллукъну кютсе де, жавапчылыкъны гьис этип, бажарывлу ёлбашчы, загьматчыгъа лайыкълы, исси янашып, гёнгюн алып, ругьун гётерип билеген ёлбашчы эди.

Магъа ишге байлавлу болуп, ону булан кёп керенлер гьакълашма, район оьлчевде баянлыкълар алма, лакъыр этме насип болгъан.

Мен ону булангъы лакъырлашывларымда гьис этген зат: ол топуракъгъа, топуракъда доланагъан адамлагъы абур да, гьюрмет де эте эди.

Бир интервьюде ол булай маъналы айтгъан сёзлер гьали де эсимден таймай. Ол булай деген эди:

–Топуракъда доланагъан адам топуракъны сююнчюн ва дертин, агъын ва зарын дегенлей яхшы биле ва анг­лай. Мен оьсюп гелеген йыллардан берли топуракъда доланма башлагъанман. Оьзюмню бары англавлу яшавум ва чалышывум юрт хозяйство тармакъ булан байлавлу гетегенге оьзюмню насипли гьисап этемен.

1973-нчю йылда Къарабудагъгент юртда ерлешген «Танг» деген совхозну производство чалышыву, юрт хозяйство продукталар болдурувну къадары энишлеме башлагъанда районну ёлбашчылары хозяйствогъа директор этип Б. Ибашевни бакъдыргъан. Ол «Танг» совхозну ёлбашчысы болуп иш башлагъан. 1-нчи йыл 1300 тон юзюм болдургъан эдик. Мен ишден таягъанда шо санав 10 керенден артыкъ артды, 14 минг 500 тон юзюм къайтаргъанын уллу ругьланыв булан эсгерегени гьали де эсимден таймай.

Багьавутдин Зиявутдинович Ибашевде гьис этген бирдагъы-бир хас зат.

Озокъда, бир Тенгирибизден къайры бары затны тюз чечмеге бир адам да болмас. Шо оьр къуллукъда ишлейгенде болгъан чакъы халкъны талапларын яшавгъа чыгъарма, оланы разилигин къазанма гьаракат этгенин яшырмай эди.

Районну ёлбашчысы болуп ишлейген йылларында колхозланы, совхозланы экономикасын, материал-техника базасын гётеривде Багьавутдин Ибашевни этген къошуму аслам. Шо йылларда Къакъашурада XXII партсъезди, Къурбукиде Ленинни атындагъы колхозлар, “Танг” совхоз республикада лап алдынлы хозяйстволар эди. Шо йылларда районда кёп оьзге тюрлю ишлер, къурулушлар къурулгъаны да бизге ачыкъ.

Гетген асруну 80-нчи йылларында бизин район республиканы районларыны арасында ал сыдралардан тюшмей юрюгенине районну башчысы болуп ишлеген Багьавутдин Зиявутдинович Ибашев де аслам къошум этгенин бирев де инкар этме болмас.

Багьавутдин Ибашев уьлгюлю ва къайратлы загьмат тёкгени саялы гьукуматны янындан тийишли къыйматлангъан «Загьмат Къызыл белгиси», «Макътавлукъну белгиси», «Уьлгюлю загьматы» учун деген медаллар булан савгъатлангъан. Кёп оьзге тюрлю савгъатлар да берилген.

Май айны 24-нде районну Гьюрметли ватандашы, кёп йыллар районну ёлбашчысы ва оьзге жаваплы къуллукъларда ишлей туруп, районну экономикасын гётеривде, социал-экономика масъалаланы яшавгъа чыгъарывда оьз къошумун болдургъан, Б.З.Ибашев бириси дюньягъа гёчдю. Гюнагьларын Аллагь гечсин, ахыр ёлу тюз болсун, Амин!

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

6