Охув йыл тамамланды

Шо пуршавлукълагъа да къарамайлы, уьлкебизни школаларында йыллыкъ охув программаланы толу кюйде яшавгъа чыгъармагъа ёллар тапдылар. Айтагъаным, май айны 25-нде Къарабудагъгентдеги 2 номерли орта школада ахырынчы зенг къагъылгъан. Гьаманда йимик, охувчулар, ата-аналар школагъа жыйылмайлы, зенг къагъывгъа багъышлангъан шатлы мердеш онлайн режимде юрюлген. Башында эсгерип къояйым, эсгерилген шо школада бу йыл 876 яш билимлерин камиллешдирген. Шолардан 71-си, (1-11-нчи клас, 3 де 9-нчу класланы охувчулары) школа булан савболлаша.

Ахырынчы зенгге багъышлангъан шатлы мердешни школаны айтылгъан муаллимлеринден бириси, къурувчу Маржанат Умаева ачгъан ва юрютген. Ол гиришив сёзюнде охувчуланы шо гюнгю шатлыкъ булан къутлагъан сонг, сёзню школаны директору Гьалимат Гьарумовагъа берген. Оьз гезигинде чыгъып сёйлей туруп, Гьалимат Гьарумова оьзюню алдында охуп билим-тарбия алып юрюген охувчу яшларын ахырынчы зенгге багъышлангъан шатлыкъ булан къутлагъан. Бу йыл школа булан савболлашагъан охувчу яшлагъа буса яхшы ёл ёрай туруп, гележекде оьр охув ожакъларда да охуп, юреги танглагъан касбулагъа ес болуп, яшавда оьз ерлерин тапмакъны ёрагъан. Ол оьзюню сёзюн узата туруп, оьзю ёлбашчы­лыкъ этеген школаны охувчуларындан Умукюсюм Ильясова, Женнет Гьюсейнова, Аминат Гьабиляева, Патиматзагьра Сайитова бу охув йылны медаллагъа тамамлайгъанын эсгерген. Ондан къайры да, школаны кёп санавдагъы охувчулары тюрлю-тюрлю спартакиадаларда, спорт ярышларда алдынлы ерлеге ес болгъанын эсгерген. Шоланы уьстюнлюклери булан оьзю де оьктем болагъанын айтгъан.

Сонг чыгъып сёйлеген выпускниклени биринчи муаллимлери: Шарапат Муселемова, Бурлият Балашова оьзлени алдында шунча йыллар охуп, тарбия-билимге кюрчю салгъан охувчуларына насипликде яхшы ёл ёрагъан. Яшавуну баш йылларындан башлап оьзлер билимли ва англавлу болсун учун къыйын тёкген муаллимлерине багъышлап охувчулар-выпускниклер Умукюсюм Ильясова, Разият Гьасанбекова, Аминат Гьабиляева, Женнет Гьусейнова, Патиматзагьра Сайитова, Зарема Вагьитова, Надия Тавлуева, Каримат Зайнавова, Кюмсият Ахавова, Зарият Къаранаева биринден-бири алып, муаллимлерине багъышлангъан шиъру куплетлерин охугъан. Клас ёлбашчы Маданият Зайналова да оьзюню класыны выпускниклерине ва бары да охувчулагъа яхшы ёл ёрагъан сонг, башлапгъы класланы охувчулары Асият Гьарумова ва Даниял Хасболатов ахырынчы зенгни къакъгъанлар. Ахырынчы зенгни къагъылывуна багъышлангъан мердешни материалларын онлайн режимден бермек учун гьазирлеген директорну ИКТ-ден орунбасары Умугьат Муселемовагъа да дирекцияны атындан уллу разилик билдириле.