Гьукуматны председатели районда
Бизин район къайсы девюрде де республиканы экономикасына оьз къошумун этип гелген. Районда загьматгъа абур этив, топуракъны ишлетивге, мол гелимлер оьсдюрювге тергев артса тюгюл, кемимей. Адам загьматы булан абурлу деп негьакъ айтылмай. Районда оьтген девюрде оьзлени къайратлы загьматы, бажарывлу ёлбашчылыкъ этивю булан авлакъ ниъматланы мол гелимлер къайтарывда, сют гьайванчылыкъда, малчылыкъ тармакъларда оьр натижаланы къолда этген хозяйстволаны ёлбашчылары, савунчуларыбыз, механизаторларыбыз, ашлыкъ оьсдюрювчюлерибиз ва оьзге тармакъланы къуллукъчулары пачалыкъны оьр савгъатларына ес болгъанлар аз тюгюл эди.
Сыйлы мердешлер, оьсюмлюклеге, юзюм, емиш бавлагъа къуллукъ этивде топлангъан бай сынавну гьалиги девюрню наслулары да инамлы кюйде узаталар.
Районну халкъыны къайратлы загьматына республиканы башын тутгъанлар гьали де яхшы тергев бакъдыра. Юртлу загьматчылар шо тергевге оьзлени гьаракаты, оьрден гелген буйрукъланы уьстюнлю кюйде яшавгъа чыгъара туруп ес болгъанлар.
Гертиден де, артдагъы вакътилерде районну юрт муниципал къурулувларыны топуракъларында юзюм, емиш бавланы, чачылагъан къылчыкълы ашлыкъланы майданлары йыл сайын арта.
Сют гьайванчылыкъ тармакъны, гьайванланы продукталыгъын артдырывда етишген уьстюнлюклер булан да республика оьлчевде макътанма болабыз. Гелген оьр къонакълагъа гёрсетме зат бар.
Алда йимик, гьали де юрт хозяйство производствону къайсы тармагъын алсакъ да, оьр натижалары булан арагъа чыгъа гелеген коллективлер бар.
Республиканы башын тутгъанлар да районда социал-экономика масъалаланы яшавгъа чыгъывуна, районда топуракъланы ишлетивню артдырывгъа тергев бакъдыра, ишлени барышын тергевню тюбюнде сакълай. Муна алдагъы гюн Дагъыстан республиканы Гьукуматыны председатели Артем Здунов ишчи сапар булан Къарабудагъгент районну юрт хозяйство продукталар болдурувчуларыны янында болгъан. Республикада, районда эпидемиология гьал авур заман районну аграрийлерини ишлерини барышына тергев этилген.
Республиканы Гьукуматыны председатели А.Здуновну бизин районгъа этген ишчи сапарын районну башчысы Магьмут Амиралиев, районну юрт хозяйство управлениесини ёлбашчысы Шагьабутдин Мустапаев ёлдашлар къаршылагъан ва узатгъан.
Оьр къонакъ Къурбуки юрт муниципал къурулувну топуракъларында ишлейгенлени «Къурбуки» деген сабанчы-фермер хозяйствосунда да болгъан.
Къурбуки юртну Манас зонасында ерлешген топуракъларда бу йылны тюшюмю учун 40 гектаргъа овош ва бахча оьсюмлюклер оьсдюрюле. Шо гюн овошчулар, бахча оьсюмлюклеге къуллукъ этеген ёлдашлар дарман урув, сугъарыв, чёп отлагъа къаршы каза урув ишлени оьтгерип тура эдилер.
Къарабудагъгент юрт муниципал къурулувну топурагъында иш гёреген оьзюне Зиявутдин Абдуллагьатов башчылыкъ этеген «Шанс» деген сабанчы-фермер агьлю – юзюмге сан янлы къуллукъ этивю, мол гелимлер алыву булан арагъа чыкъгъан районда алдынлы предприятиени бири. Мунда борланы гьар-бир къуллукълары агротехника гёрсетеген болжалларда сан янлы оьтгериле. Шо саялы натижалар да йылдан-йыл гёрмекли.
2020-нчы йылда да тюеклерде юзюм яман гёрюнмей. Бары гюч тюшюмню аврувлардан къоруп сакъламакъ учун бакъдырылгъаны гёрюне. ДР-ни Гьукуматыны председатели А.Здунов оьрде эсгерилген предприятиени юзюмлюклеринде де болгъан, борланы гьалына, этилеген къуллукълагъа тергев этген.
А.Здунов бизин районгъа этген ишчи сапарында райондагъы авур гьалгъа да къарамайлы, юрт хозяйство тармакъны къуллукъчуларыны къайратлы загьматына яхшы багьа берген.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
