Тергевню тюбюнде

Районну башчысы Магьмут Амиралиев юртгъа этген сапарында юртну имамы А.И.Абдуллаев ва юртну башчысы И.Изиев булан айрыча ёлукъгъан, олай да юртлуланы савлугъун сакъламакъ учун санитар врачланы гёрсетивлерин, оразабайрам гюнлерде алимлени чакъырывун къатты кюйде сакълама герегин эсгерген. Сапарда М.Амиралиев 2020-2021-нчи йыллагъа Паравул юртну социал-экономика оьсювюн болдурмакъ учун этме герекли ишлени планларын да анализ этген.

2020-2021-нчи йылларда этме гёз алгъа тутгъан ишлер юртлуланы яшав даражасыны сан янын яхшылашдырма болушлукъ этежекге шек ёкъ.

Паравул юрт администрация ерли инициативлер деген программагъа къошулуп, 3 проектде ортакъчылыкъ эте:

Ичеген сув жыйылагъан резервуарны къурулушу.

Юртдагъы ял алагъан паркны айлана ягъын безендирив.

Нас-алагъожа ташламакъ учун контейнерлер салма майданчалар къурув.

2020-нчы йылда юртну ичиндеги Изиевни ва Шихсайитовну аты къоюлгъан орамлагъа 2000 квадрат метр ерге асфальт салма, Яр-бурун деген ерден 550 метр мезгилге сув быргъылар тартма гёз алгъа тутулгъан.

Паравул ва янгы Паравул юртларда эки яшлар бавун къурма план гьазир.

Янгы Паравулда янгы школаны къурулушун башл

ама, 2 гиччи (мини) футбол майданчалар къурма гёз алгъа тутулгъан. Юртдагъы 1 номерли орта школаны бинасына капитал ремонт этме хыял этиле. 1 номерли СОШ “100 школа” деген проектде ортакъчылыкъ эте.

“Юрт территорияланы комплекс къайдада къурув” деген программа булан 45 гектар ерни онгарма къаст бар. Бугюнлерде Паравул юртда 12 чакъырым мезгилдеги сугъарыв сув татавулну тазалав ишлер юрюле. Шону натижасында районда лап уллу 3,2 миллион куб сув сыягъан Аччы-къарыв кёлню сувдан толтурма имканлыкъ яратылажакъ. Шо буса 700 гектар къошум топуракъланы ишлетме болушлукъ яратажакъ.