Районну башчысы юртларда

Айтма тарыкъ, артдагъы вакътиде адамлар коронавирус инфекция аврувну къоркъунчлугъун англагъан. Оьзлени айланасындагъы агьлюню уьюрлерини савлугъуна гьайлы янашалар. 65 йыл битеген, оьрдеги оьмюрге баргъан адамлар «самоизаляция» чарагъа жаваплы янашагъанын эсгерме тарыкъ. Къайсыбыз да гьис этгенбиз: юртланы орамларында адамлар сийрек ёлугъа. Оьмюрге баргъан адамлар лап уьзюрю болмаса, къыргъа чыкъмай. Шо тюз.

Районда коронавирус инфекция гьал ёрукълаша бара буса да, ону къоркъунчлугъу толу кюйде тайып битмеген. Гьали де «югенлени» йиберме тез.

Районда коронавирус инфекция аврувну алдын алыв, авруйгъанланы савлугъуну гьайын этив аслу масъала буса да, районну башчысы М.Амиралиев гезикли ишлени, гёз алгъа тутулгъан планланы яшавгъа чыгъывун да тергевню тюбюнде сакълай.

Жуманы башында М. Амиралиев район больницаны баш врачы Р.Гьиравовну узатыву булан Дёргели юрт муниципал къурулувда болгъан. Юртну башчысы Гь.Мурзаев булан юртну ичиндеги аслу масъалалар арагъа салынып къаралгъан.

Районну башчысыны Дёргели юртгъа этген сапарыны аслу мурады – 2020-2021-нчи йыллагъа юртну ичинде этме гёз алгъа тутгъан ишлер.

- Бугюн-деди М.Амиралиев – лап аслу масъала коронавирус инфекция аврувну алдын алывда «самоизоляция» санала. Районну башчысы коронавирус инфекция аврувну яйылывуну алдын алыв чарада Дёргели юртгъа гиреген, чыгъагъан ерде дружиналаны къурумлу ишин макътагъан. Ондан къайры да районну башчысы М.Амиралиев юртгъа авруйгъанлар учун таман даражада дарманлар гелтирилгенни, тарыкълылагъа кёмек этилежегин, тувулунгъан гьалны гьисапгъа алып, район больницаны баш врачына авур аврувлагъа район больницада стационар медицина кёмегин болдурма, 10 койка ери булангъы больница ачма тапшурувлар берди.

Минсельхоз линиясындан юртда 5 проект иш гёре: агъым сувлар, ёлавчу зона, ойнайгъан ер, спортмайданча, нас-алагъожа ташлама контейнерлер салагъан ерлер.

Минэкономика линиядан эки проект: агъым сувлар гетеген ер, Исаевни атындагъы орамда адамлар юрюйген ер.

Янгы больницада ахырынчы ишлер ва къураллар алыв. 200 яшгъа ери булангъы яшлар бавуну тамамланыву.

Ёл фонддан таба Садовая орамны, межитни, медресени алдын асфальт этив.

Минкультураны линиясындан таба юрт клубгъа ремонт этив.

Сув булан таъмин этив ишлени 2020-нчы йылда тамамламакъ.

2020-2021-нчи йылларда юрт территорияланы комплекс оьсювюн болдурмакъ муратда федерал программа булан 249 миллион манатны къадарына ишлер этме тарыкъбыз. Янгы планланы микрорайонуну проектлерин этив, тарыкълы пачалыкъ экспертиза кагъызланы онгарыв, тамамлав-2021 йыл.

Районну башчысы Дёргелиге этген сапарында оьзге масъалалар да арагъа салынып ойлашылды.