Иш сапар булан Къурбукиде

Бугюннню аслу масъаласы коронавирус аврув инфекциядан сакъланмакъ муратда жамият кёп жыйылагъан ерлеге бармай уьйлеринде турма герек. Аврувну белгилери шеклик тувдура буса, врачланы чакъырып, уьйден чыкъмагъан кюйде савлугъун камиллешдирмекни гьайын этмеге герегин билдирген районну башчысы. Эсгерилген аврувланы сав этмек учун тарыкълы дарманлар районгъа гелтирилгенни, шо дарманлар чарасыз аврувлулагъа тегин берилегенин де Магьмут Амиралиев оьзюню лакъырында эсгерген. Оьз гезигинде юртну башчысы М.Маматгереев буссагьатгъы вакътиде волонтёрланы кёмеклиги булан юртну халкъыны савлугъун камиллешдирмек учун этилинип турагъан ишлени ва гележекде этилинмеге гёз алгъа тутулгъанлары гьакъда айтып, районну башчысына малим этген. Ол айтгъан кюйде, 2020-нчы йылны ичинде Къурбуки юртну «Садовая», «Школьная» орамларын (2456кв.м.-2340 кв.м.) мезгилни асфальт этмек, «Центральный» орамны ягъасында адамлар юрюмек учун тротуарны арив этип онгармакъ. Ерлерде нас жыягъан контейнерлени ерлешдирмек учун майданчаланы гьазирлемек йимик ишлер этилинмеге гёз алгъа тутулгъан. Сонг да, юртлу яшёрюмлер учун спорт майданчаны, культура уьюню ремонт ишлерин тамамлап гьазирлеме тарыгъын ачыкъ этген юртну башчысы М.Маматгерев. Ондан къайры да, лакъырлашывну вакътисинде юртда къурулма тарыкълы яшлар бавуну, олай да Манас посёлокда къурулажакъ школаны тарыкълы документлерин артгъа тебермейли, гьазирлеп тийишли ерлерине тапшурмакъ таклиф этилди. Лакъырлашывну ахырында эки де ёлбашчы 2021-нчи йылда юртда этилме герекли (ёлланы онгарыв, юртну газ булан таъмин этив, ярыкълашдырыв, олай да сув булан таъмин этив) масъалаланы гьакъында да хабар юрютдюлер. Сонг Магьмут Амиралиев М.Маматгереев де булан бирче юрт участка больницасында да болдулар. Онда ишлеме башлагъан компьютерная томографиягъа да тергев этдилер. Эсгерилген участка больницаны баш врачы Магьамматрасул Зайналов гелген ёлдашланы больницаны бугюнгю ишлери булан ювукъдан таныш этди. Сонг юртну башчысы М. Маматгереев ва больницаны баш врачы М.Зайналов къурбукилилени гьайында къалып, оьзюнден болагъан кёмеклени этип юрюйген районну башчысы Магьмут Амиралиевге юртлуланы атындан баракалласын билдирдилер.