Бир тюрлю енгилликлер токъташдырылгъан

Оьтгерилген шо генгешни барышында Россияны Президенти Владимир Путин инг алда билдиргени йимик, бизин уьлкеде ишлеймейген гюнлер май айны 12-синден тутуп токътатылагъаны гьакъда билдирген. Шо гьакъда айта туруп, ол коронавирус аврувну яйылывгъа байлавлу белгиленген гьаракатланы юрютмеге тюшеген ёругъун гележекде уьлкени гьар регионуну ёлбашчысы айрыча оьзю белгилежек. Ону сёзлерине гёре, бу йылны март айыны 28-нде коронавирусну яйылывуну алдын алывгъа байлавлу савлай уьлкеде белгиленген гери урув чараланы шо къоркъунчлу аврувгъа байлавлу гьар регионда тувулунгъан гьалны гьисапгъа алып, гери урув чараланы енгилешдирмеге тюше.

Шондан къайры да, савлай уьлкени оьлчевюнде 15 йылгъа ерли чагъындагъы авлетлер тарбияланагъан гьар агьлюге 10 минг манатны къадарында бир керен акъча берилежек. Шо къадардагъы акъча ватандашланы къазанчыны оьлчевю гьисапгъа алынмайлы, бир гесимде берилежек. Уьч йыл битгинчеге ерли чагъындагъы яшлар тарбияланагъан агьлюлеге гьар ай 5 минг манат тёленежек. Бу йылны июн айыны 1-нден тутуп, къазанчы лап аз даражада къалып турагъан чарасыз гьалында яшайгъан 3 йылдан 7 йылгъа ерли чагъындагъы яшлары булангъы гьар агьлю лап аз оьлчевде токъташдырылгъан бир айлыкъ загьмат гьакъны (МРОТ) яртысыны къадарында берилеген акъчаны да алмагъа болажакъ. Шо да коронавирусну яйылывуна байлавлу тувулунгъан четим шартларда гьар агьлюге якъламакъ учун гёз алгъа тутулуп яшавгъа чыгъарылагъан чараланы аслуларындан болуп токътай.

Россияны Президенти эсгергени йимик, май айны 12-синден сонг, экономиканы кюрчюсю болуп токътайгъан къурулушланы юрютеген, уллу промышленный предприятиелени ёрукълашдырыв булан бирче шоланы оьсювюн болдурмакъ муратда мекенли чараланы белгилемеге тюшегенин де ташдыргъан. Юрт хозяйство, байлавлукъ, энергетика, табии майданланы чыгъарыв булан байлавлу тармакъланы ишине айрыча агьамият берилмеге тюшегени гьакъда да айтгъан.

Бизин уьлкеде уьйкъамавну шартлары гийиргенлик булан байлавлу зарал гёрген предприятиелер ва компаниялар оьзлерде загьмат тёгеген ишчилеге ва къуллукъчулагъа айлыкъ алапаланы тёлемек учун 2021-нчи йылны апрель айына ерли 2 процент булан несия (кредит) алмагъа болажакъ. Шо предприятиелерде ва компанияларда загьмат тёгегенлени лап аз алып айт­гъанда, 90 проценти ишден тайдырылмай сакъланмакъ шо несияны беривню аслу шарты болуп токътай. Эгер де, предприятиелер ва компаниялар гелеген йылны апрель айына ерли сакъласа, несиягъа гёре берилмеге тюшеген процентлер пачалыкъны янындан тёленежек.

Орта ва увакъ бизнесни вакиллерине ва онгача чалышагъан далапчылагъа да бир тюрлю енгилликлер токъташдырылгъан. Шолай, олар бу йылны апрель-июнь айларына налог ва страховой тёлевлерден эркин этиле. Оьзлени оьзлер иш булан таъмин этип чалышагъан ватандашлар 2019-нчу йылда тёлеген налоглар толу кюйде къайтарылажакъ. Шолай да, олагъа бизин уьлкеде лап аз оьлчевде токъташдырылгъан бир айлыкъ загьмат гьакъны къадарында налог капитал да берилежек.

Россияны Президенти Владимир Путин оьзюню сёйлевюнде коронавирус аврувну алдын алыв гьаракатгъа къуршалгъан медицина къуллукъчуланы якълавгъа байлавлу да айрыча эсгерген. Ачыкълашдырып айтгъанда, олагъа токъташдырылгъан къошум гьакъланы гечикдирмей заманында тёлемекни де талап этген.