Мекенли иш юрюле

Коронавирус инфекция Китай, США, Испания, Италия ва оьзге пачалыкъларда генг кюйде яйылгъан, авруйгъанланы, оьлгенлени санаву кёп.

РФ-ни башын тутгъанлар коронавирус инфекция аврувну алдын алмакъ, яйылывун кемитмек учун мекенли чаралар гёрюп тура. Айрокъда, артдагъы жума коронавирусну яйылывуну алдын алмакъ муратда къатты чаралар гёрюлген. Кёбюсю чаралар, шатлыкълар ­оьтгермеге къоймай токътатылгъан. Уьзюрю болмай туруп, тюкенлеге, аптеклеге барма тюшмей. Уьлкени кёбюсю районларында жумалыкъ карантин билдирилген.

Дагъыстан республиканы Башчысыны къарары булан республиканы районларында коронавирусну алдын алывда айрыча чаралар белгиленген.

Республиканы башчысыны къарарын яшавгъа чыгъара туруп, бизин районда да коронавирусну яйылывуну алдын алмакъ муратда оператив штаб къурулгъан. Штабгъа районну башчысыны биринчи орунбасары Агьмат Гьажиев ёлбашчылыкъ эте. Штабны уьюрлери – районну къурумларыны жаваплы къуллукъчулары.

Районда коронавирус аврувну яйылывуну алдын алывгъа байлавлу болуп, бары шатлы мажлислер, банкет залларда тойлар, спорт ярышлар ва оьзгелерин оьтгерив токътатылгъан. Районну ичиндеги къурумларда, идараларда ишлейгенлер акъчасын сакълап жумалыкъ ял алывгъа йиберилген.

Алдагъы гюн штабны ёлбашчысы Агьмат Гьажиев район газетни баш редактору А.Гьажиев, РОВД-ни къуллукъчулары булан райцентрдагъы шатлы мажлислер оьтгерилеген заллар, спорт майданчалар коронавирус инфекциягъа къаршы гёрюлеген чараланы юрютеген кююн тергеп чыкъгъанлар. Шо гюн оператив штабны гёрсетивлерин бузгъанлар ёлукъмагъан. Шолай тергевлер гьар гюн оьт­герилежек.

Коронавирус инфекцияны яйылывуну алдын алмакъ муратда райцентрны халкълар кёп жыйылагъан орамларын, майданчаланы, скверлени хас техника булан дезинфекция раствор булан себип чыгъа. Шо чарагъа къуршалгъан бары да ёлдашлар медицина тергевден оьте, профилактика чараланы сакълайлар.