Меню
16+

Сетевое издание "Району яшаву"  «Будни района»

02.04.2020 17:37 Четверг
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Аслу масъалалагъа къаралды

Автор: Шихав Къайирбеков

Март айны 31-нде «Къарабудагъгент район» муниципал районну Жыйыныны депутатларыны 3-нчю керен чакъырылагъан гезикли 33-нчю сессиясы болду. Сессияны гиришив сёз булан депутатланы район Жыйыныны председатели Бекболат Сахаватов ачды ва юрютдю.

Сессияда район Жыйыныны 50 депутатыны 47-си ортакъчылыгъын болдурдулар. Сессияда юртланы башчылары, районну маълумат къуралларыны вакиллери де ортакъчылыкъ этдилер. Мунда булай затны эсгермекни маънасы бар. ДР-ни башчысыны къарары булан районда спорт ярышлар, кёп санавдагъы адамланы ортакъчылыкъ этивю булан шатлыкълар, оьзге масса ишлер оьтгерив гери урулгъан. Шо саялы сессияда бары да тарыкълы эпидемиология чаралар къатты сакъланды. Шогъар гёре сессиягъа къонакълар чакъырылмагъан эди.

Сессияда 4 масъала арагъа салынып ойлашылды.

1-нчи масъала – «Къарабудагъгент район» Муниципал районгъа башчы сайлав.

2-нчи масъала – Россия МВД-ни бизин райондагъы бёлюгюню 2019-нчу йылдагъы иши гьакъда.

3-нчю масъала – район Жыйыныны депутатлары «Къарабудагъгент район» муниципал районну 2020-нчы ва планлы 2021 ва 2022-нчи йыллагъа ерли къабул этген къарарына алмашынывлар, къошумлар этив.

4-нчю масъала – «Къарабудагъгент район» муниципал районну бюджет процессине ва бюджет аралыкъланы Положениесине алмашынывлар ва къошумлар этив.

Сессияда биринчи масъалагъа гёре «Къарабудагъгент район» мунипал районну башчысын сайлавгъа байлавлу къурулгъан конкурс комиссияны председатели Анвар Халилов гьисап берди.

Ону сёйлевюнде ачыкъ болгъаны йимик, комиссияны уьюрлери конкурс комиссиягъа берген 3 кандидатны документлерине къарагъан. Олар: Магь­мут Амиралиев, Абсалам Ильясов, Сапиюлла Сайитов.

Кандидатланы программаларына тынглап ва комиссияны заседаниесини гьасиллерине гёре «Къарабудагъгент район» муниципал районну Жыйыныны депутатларына районну башчысы этип сайлама эки кандидатураны таклиф эте:

1.Амиралиев Магьмут Гьюсейнович Сайитов Сапиюлла Ризванович.

Сессияда «Къарабудагъгент район» муниципал районну Жыйыныны депутатлары ачыкъ тавуш берив булан бир гёнгюлден районну башчысыны къуллугъуна Магьмут Амиралиевни кандидатурасына тавуш бердилер.

Магьмут Амиралиев район Жыйыныны депутатларыны сессиясыны къарары булан 5 йыл болжалгъа сайланды.

Сессияда къысгъаракъ сёз булан М.Амиралиев сёйледи. Ол биринчилей район Жыйыныны депутатларын оьзюню кандидатурасын якълагъангъа ва тавушларын бергенге разилик билдирди. Сёзюн узата туруп, М.Амиралиев:

-Оьтген вакътини ичинде юртланы башчыларыны, район Жыйыныны депутатларыны якълаву, юртланы жамиятларыны вакиллери булан ерлерде кёп ишлер этилгенин сиз гёрюп турасыз. Бугюн этилген ишлени такрарлама маънасы ёкъ. Амма алда районну социал-экономика оьсювюн, халкъланы яшав даражасын гётермек, юртланы безендирмек, юртлуланы талапларын яшавгъа чыгъармакъ учун алда уллу планлар токътагъан. Сизин, депутатлар, юртланы активи булан бирче шо программаланы яшавгъа чыгъарывну уьстюнде ишлеме тарыкъбыз. Бирдагъы керен сизге баракалла,-деди.

Сессияда экинчи масъалагъа гёре районну ич ишлер бёлюгюню начальниги, полицияны подполковниги Герей Гереев гьисап берди.

Ол оьзюню сёйлевюн булай башлады:

-Гьюрметли Магьмут Гьюсейнович, гьюрметли район Жыйыныны депутатлары! 2019-нчу йылда бизин бёлюк бары гючюн жинаятчылыкъны , административ ихтияр бузувланы алдын алывгъа, жамият низамны къорувгъа, къоркъунчсузлукъну болдурувгъа бакъдыргъан.

Районну ич ишлер бёлюгю районну ичиндеги оьзге ихтияр якълав къурумлар булан бирликде иш гёрюв­ню натижасында районда оператив гьалны ёрукълашдырывда, ватандашланы ихтиярларын, интереслерин якълавда бир къадар иш этилген.

Оьтгерилген чараланы натижасында районну МВД бёлюгюню оператив-къурумлар чалышывунда яхшы янгъа багъып алмашынывлар бар.

2019-нчу йылны гьасиллерине гёре районда регистрация этилген жинаятчы ишлер 19-гъа кемиген. Демек, гетген йыл районну территориясында 371 жиниятчы иш болгъан. 2018-нчи йылда шо санав 390 болгъан. Районда авур, айрыча авур жинаят ишлер 87 регистрация этилген. Тенглешдиреген вакъти шо санав 101 эди.

Адамны савлугъуна зиян этеген уручулукъ, мошенниклик, ёлларда болагъан хатабалагьларда оьлгенлени санаву кемий. Гетген йыл хатабалагьдан 15 адам оьлген. Бу йыл булан тенглешдиргенде шо 5-ге аз.

Районда законсуз наркотиклени айландырыв арта,61 гезик болгъан. Законсуз наркотиклер сатыв, жинаятчы ишлени санаву да артып юрюйгени талчыкъдырмай болмай. Гетген йыл ихтияр якълав къурумланы къуллукъчуларыны гьаракаты булан 4 кило 240,75 гр наркотиклер чыгъарылып алынгъан.

Районну ватандашларыны арасында англатыв-масса ишлер оьтгерилгени саялы, адамланы арасында савутларын гёнгюллю кюйде берегенлени санаву артып юрюй.

Уручулукъ, наркотиклени къоллав булан жинаятчы, экономика жинаятчылыкъны юзюн ачыв хыйлы къолайлашгъан. Демек, 96,7 процентге гётерилген.

Районну ич ишлер бёлюгюню начальниги Г.Гереев оьзюню сёйлевюн узата туруп, районда терроризмни, дин экстремизмни алдын алмакъ муратда районну ватандашларыны арасында генг кюйде англатыв ишлер юрюдю. Шогъар да къарамайлы, 2019-нчу йылда экстремист, террорист 11 жинаятчылыкъ иш болгъан. Уллубийавул, Губден, Къарабудагъгент юртланы ювугъундагъы агъач массивлерде 3 савут ва патронлар сакъланагъан ер табулгъан.

Районну ич ишлер бёлюгюню къуллукъчулары жамият низамны болдурувда, жамият къоркъунчлукъну алдын алывда актив кюйде ортакъчылыкъ эте.

Гёрюлюп турагъан ишлеге де, ёлларда къоркъунчлукъну алдын алыв чаралагъа да къарамайлы, ёллардагъы гьал авур кюйде къалып тура.

2019-нчу йылда «Кавказ» федерал ёлда болгъан аварияланы да гьисапгъа алгъанда, ёлларда 584 хатабалагь болгъан. Ёлларда болагъан хатабалагьланы аслу себеби: къаршы гьызгъа чыгъыв, машинлени бек гьайдав ва оьзгелери.

Оьзюню сёзюн тамамлай туруп, районну ич ишлер бёлюгюню начальниги Герей Гереев районда жинаятчылыкъны алдын алывда, жамият низамны болдурувда полицияны къуллукъчулары ерли муниципал къурумлар булан тыгъыс кюйде иш юрютегенин эсгерди.

Сессияда 3,4-нчю масъалалагъа байлавлу районну финанс ишлер управлениесини начальниги Абакар Шагьманаев алмашынывлар, толумлашывлар не себепден этилегенин толу кюйде ачыкъ этди.

Депутатлар сессияда къаралгъан масъалалагъа гёре тийишли къарарлар къабул этдилер.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3