Этилген ишлер дазу тюгюл
Районну башчысы М.Амиралиев юртлагъа этеген сапарын узата туруп, талатгюн, февраль айны 11-нде, Паравул юртда болду. Юртну орта школасыны залында юртну активи, ерли депутатлар, тамазалар булан ёлукъду. М.Амиралиевни Паравул юртгъа этген сапарында районну жаваплы къуллукъчулары узатдылар.
Районну башчысы М.Амиралиев жыйылгъанлар булан саламлашып битген сонг, оьзю юртну активи, жамияты булан не себепден ёлукъма сюегенин ачыкълашдырды.
- Мени бугюн сизин юртда болмакълыгъымны себеби сизин булан 2019-нчу йылда юртугъузда, шону ичинде савлай районда не йимик ишлер этилген, бу йыл, сонггъу йыллар не ишлер этсек, не ишлеге урунсакъ яхшы. Сизин пикруларыгъызны, ойларыгъызны билме, гьакълашма гелгенмен.
Тарихге гетген йыл бизин районда, шону ичинде Паравул юртда социал-экономика масъалаланы чече туруп, кёп ишлер этилди. Этилген ишлер – республиканы башчысы В.Васильевни якълаву, республика инвестиция программалагъа къошулуп иш гёргенибизни натижасы.
Гетген йыл Паравул юртда да аз иш этилмеди. Демек, «100 школа», «Точка роста» программагъа къошулуп Паравул 1 ва 2 орта школалагъа ремонтлар этилди, кабинетлер онгарылды.
Паравул юртну ичеген сув булан таъмин этивде хыйлы иш этилген. Сувну масъаласы юртда толу кюйде чечилип битмеген. Ону уьстюнде бу йыл да ишлежекбиз. Сувну тазалайгъан, дезинфекция этеген ерлер къурма тарыкъ.
Ондан къайры да, бу йыл юртда, Янгы Паравулда яшлар бавлары къурулажакъ,- деди М.Амиралиев.
Оьзюню сёйлевюнде М.Амиралиев юртланы ёл хозяйствосун ёрукълу сакъламакъ учун харж, жыйылгъан транспорт налогну къадарына коэффициент де къошуп берилежегин аянлашдырды.
- Къайсы муниципал къурулув нечакъы транспорт налог жыйса, шончакъы акъча къайтып юртгъа геле, — деди М.Амиралиев.
М.Амиралиев юртну масъалаларын чечивде юртну башчысын, ерли депутатланы, юртну активин гьар тюрлю федерал республика программаларда ва проектлерде актив кюйде ортакъчылыкъ этме чакъырды. Лап аслусу: тарыкълы кагъызланы тюз, хатасыз гьазирлеме тарыгъын эсгерди.
Бу йыл Паравул юртда «Местные инициативы» деген программа булан контейнерлер салагъан майданчалар, искусственный футбол майданча, кёпюр онгарылажакъ.
Районну башчысыны паравуллулар булангъы ёлугъуву жанлы ва бир-биревню англавну ругьунда оьтдю. Районну башчысына юртда не йимик ишлер этилсе яхшы болажагъына пайдалы таклифлер бердилер. Масала: Осман Магьамматов, Абдулманап Бабатов, Агьмат Магьамматов, Абдулла Бамматов ва оьзгелери юртдагъы амбулаторияны реконструкция этме, жамият ерлени онгарма, юртну электрик гюч булан таъмин этивню ёрукълу чечме, юртну янгы микрорайонларына газ тартма кёмек тиледилер. Олай да, юртда бар оьзге тюрлю масъалалар да гётерилди.
Ёлугъувда Паравул юртну башчысы Иманали Изиев юртда этилген ишлени ташдырды. Масала, 5300 метрге сув быргъылар салынды. Сувну тазалап юртгъа таза сув йибереген ер къурма ва 600 кубометр сув сыягъан хас резервуар этме умут бар.
- Юртну жамиятыны гьайванларына аврув къабунуп тайдырма тюшдю. Халкъгъа уллу зараллар болгъан эди, насипге, районну башчысы М.Амиралиевни кёмеги булан гьукуматдан 8 миллион манат гелди. Шо бары да гьайваны оьлген ватандашлагъа пайланып берилди, — деди И.Изиев.
Юртлуланы соравларына жаваплар бере туруп, М.Амиралиев 2020-нчы йылда районда 9 яшлар баву, шону 2-си Паравулда къурулма башланажагъын, оьзге проектлер яшавгъа чыгъажагъын ачыкълашдырды.
Районну башчысы эсгерилген проектлер районда ВПП «Бирикген Россия» партияны сиптечилиги булан амалгъа гелгенин яшырмады.
Чараны гьасилин чыгъара туруп, Паравул юртну башчысы Иманали Изиев, загьматны ветераны, пенсионер Ибадулла Ибадуллаев ёлдашлар юртлуланы атындан ДР-ни башчысы В.Васильевге, ДР-ни Халкъ Жыйыныны депутаты М.Магьамматовгъа, районну башчысы М.Амиралиевге Паравул юртда этилген, этме гёз алгъа тутгъан ишлер саялы баракалла билдирдилер.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.