Ветеринар къуллугъуну ишине къаралды

Чараны гиришив сёз булан районну башчысы М.Амиралиев ачды ва юрютдю.

Районну башчысы залдагъылар булан саламлашып битген сонг, трибунагъа районну ветеринар къуллугъуну къуллукъчулары ветеринар-эпизоотический аврувланы алдын алыв иш нечик салынгъаны гьакъда къысгъартып мукъаятлы кюйде маълумат бермек учун, районну ветеринар къуллугъуну ёлбашчысы Исмайыл Гьажиевни чакъырды. Трибунагъа гётерилген И.Гьажиев оьзюню сёйлевюнде бу йылны оьт­ген 11 айыны ичинде районну ветеринар къуллугъуну къуллукъчуларыны янындан есликни гьар тюрлю къайдаларында сакъланагъан гьайван-малда, тавукъларда болагъан аврувланы алдын алывда, ветеринар-санитар чараланы оьтгеривде этилген ишлени малим этди.

Гьакъыкъатда, бруцеллёз аврувну токъташдырмакъ учун 13088 уллу мююзлю гьайванлар, 177 ат, 16557 гиччи мююзлю гьайванлар тергевден чыкъгъан. 79 гьайван бруцеллёздан авруй деп токъташдырылгъан.

Туберкулёз аврувгъа 10782 уллу мююзлю гьайванлар тергевден ­чыкъгъан, авруйгъаны токъташдырылмагъан.

Исмайыл Гьажиев сёйлевюн давам эте туруп, октябр айны 27-нде Къакъамахи юртда яшайгъан М.М.Мусаев деген адам оьзюню абзарында сакълангъан тананы сойгъанда, «сибирская язва» аврувдан авруй деп токъташдырылды. Авруйгъан эт булан къатнашгъан 5 адам авруп больницагъа тюшген.

Аврувну алдын алмакъ учун районну башчысыны актив гьаракаты булан районну ветеринар къуллугъуну къуллукъчулары дестине карантин билдирип, бары да ветеринар-санитар, производство-хозяйство, медицина-санитар чаралар оьтгерилгенин аян этди. Гьал ёрукълашгъан.

Районну ветеринар къуллугъуну башчысы оьзюню сёйлевюнде ветеринар къуллукъчулар гьайванланы арасында ветеринар-профилактика аврувну токъташдырыв, сав этив ишлени оьтгеривде бир тюрлю четимликлеге ёлугъагъанын ачыкълашдырды. Чинкдеси, районгъа республиканы, уьлкени оьзге регионларындан тергевсюз, тарыкълы кагъызлары ёкъ туруп, гьайван- мал ташылып тура.

Докладчы оьзюню сёйлевюнде районда ветеринар-санитар, профилактика ишлени оьтгермек учун касбучулар адамланы уьйлерине барып тапмагъан сонг, бир баргъан ерге эки-уьч керен барма тюшеген гезиклер болгъанын эсгерди. Ерлерде таман даражада гьайванланы арасында ветеринар-профилактика чараланы оьтгерме гюренлер етишмейгенин, барлары да талаплагъа жавап бермейгенин яшырмады.

Районну ветеринар къуллугъуну ёлбашчысы оьзюню сёйлевюн тамамлай туруп, районда ветеринар-санитар эпизоотика гьалны ёрукълашдырмакъ учун гёз алгъа тутгъан планланы ачыкълашдырды. Лап аслусу, хамисгюнлер Манас базаргъа сатмакъ учун гелтирилеген гьайван-малгъа тийишли кагъызлары болмаса, полицияны къуллукъчулары булан гирме къоймасны чаралары гёрюлежегин эсгерди.