Меню
16+

Сетевое издание «Будни района»

04.12.2020 09:01 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Проектлер яшавгъа чыгъарыла

Автор: Багьавутдин Самадов

Белгили кюйде, бизин республикабызда «Мой Дагестан» деген баш булан бир нече проектлер яшавгъа чыгъарыла. Шо проектлени ДР-ни алдынгъы башчысы Владимир Васильев къабул этген эди. Демек, «Мой Дагестан» деген баш булан республикабызда оьтгерилеген проектлер бизин районубузда да яшавгъа чыгъарылып тура. Шо проектлени яшавгъа чыгъарылывуна районну башчысы Магьмут Амиралиев оьзюню гьар гюнлюк тергевюн болдура.

Шоллукъда, алдагъы гюнлерде районну башчысы Магьмут Амиралиев «Мой Дагестан – мои дороги», муниципал ёл фонд ва транспорт налогдан жыйылгъан харжгъа гёре районну ичинде оьтгерилген ишлени барышына тергев этди.

Демек, шо гюн районну гьакимбашы М.Амиралиев Къарабудагъгент юртдагъы Абдуллаевни аты къоюлгъан орамгъа салынгъан асфальтны тергеди. Эсгерилген орамгъа 7300 квадрат метр майдангъа сан янлы асфальт салынгъан.

Сонг районну башчысы Магьмут Амиралиев УЖКХ-ны жаваплы къуллукъчусу булан Губден ва Къурбуки юртлагъа да тергев булан бардылар. Масала, Губденде «Мой Дагестан – мои дороги» деген проектге гёре 11 минг квадрат метр ёллагъа ва орамлагъа мукъаятлы асфальт салынгъан. Шолай Къурбуки юртгъа да 5 минг квадрат метр майдангъа асфальт этилинген.

Эсгерилген юртланы гьакимбашлары республиканы ичинде юрюлеген шо проетлеге гёре гьар юртгъа этилген ишлер саялы, районну башчысы М.Амиралиевге ва оьзге тюрлю къурумланы жаваплы къуллукъчуларына баракалласын ва разилигин билдире.

Оьрде эсгерилген кюйде, районну ичинде орамланы ва ёлланы онгармакъ ва ремонт этмек муратда бир нече тюрлю программа ва проект юрюле.

Ачыкълашдырып айтсакъ, «Мой Дагестан – мои дороги» деген проектге гёре районну ичинде 2020-нчы йылны боюнда 19 объектде ремонт этилинген. Шо этилинген ремонт ишлени умуми харжы 30 миллион манатгъа етишген. Демек, шо харжгъа районну ичиндеги бары да юртларда 42 минг квадрат метр майдангъа, орамлагъа ва ёллагъа асфальт салынгъан, ремонт этилген.

Шо эсгерилген ишлер адамлардан жыйылгъан транспорт налогну къадарына гёре этилген. Айтагъаным, 2019-нчу йылны узагъында районда машин гьайдавчулардан 30 миллион манатны оьлчевюнде транспорт налог жыйылгъан. Шо транспорт налогну къадарында гьар юртда муниципал ёл фондгъа гёре ремонт ишлер этилинген.

Олай да, муниципал ёл фонд булан 2020-нчы йылны ичинде 28 миллион 265 минг манатны къадарында районну ёлларына асфальт салынгъан. Шону ичинден муниципал ёлланы тийишли даражада сакъламакъ муратда 5 миллион 7000 минг манат акъча гёрсетилген.

Муниципал ёл фонддан таба Губден, Ленингент, Къурбуки, Дёргели, Къарабудагъгент, Паравул, Гьели, Манасгент юртлардагъы орамлагъа асфальт салынгъан.

«Дагавтодор» идараны харжындан таба Къарабудагъгентден Дёргелиге барагъан ёлну беш чакъырымына ремонт этилинген. Шо ёл Къакъашурадан таба оьте. Шо ишлер учун 46 миллион манатны къадарына харж гёрсетилинген.

Олай да, Манасгент-Сергокъала юртну онгармакъ муратда 42 миллион манат харж гёрсетилген. Къарабудагъгентден «Кавказ» Федерал ёлну 3 чакъырымы 33 миллион 500 минг манатны къадарында иш этилинген.

Ёлланы онгарывда районну ичинде уллу ишлер этилип турагъанын барыбыз да гёребиз. Шо ёлавчуланы ва машин гьайдавчуланы сююндюрмей болмай.

Шо саялы да районну ичиндеги бары да юртларда орамланы ва ёлланы онгармакъ ва ремонт этмек учун чалышып, белбюгюп айланагъан район администрацияны ёлбашчыларына ва жаваплы къуллукъчуларына, къурулуш къурумланы ишчилерине баракаллабызны ва разилигибизни билдирмеге тийишли.

Чинкдеси, транспорт налогну заманында ва къадары булан тёлейген ватандашлагъа ва гьайдавчулагъа айрыча баракалла билдирмеге ярай. Шо гьакъда районубузну гьакимбашы Магьмут Амиралиев нече керенлер: «Гьар юртдан нечакъы къадар транспорт налог жыйылса, шо юртгъа шо налогну къадарында орамлагъа асфальт салынажакъ ва ремонтлар этилежек. Шо саялы да, ватандашланы транспорт налогну тёлемеге чакъыраман»,- деп айтгъан.

Гертилей де, «Мой Дагестан – мои дороги», муниципал ёл фонд ва транспорт налогдан тарихге гетип барагъан 2020-нчы йылны ичинде районубузда кёп уллу къадарда ишлер кютюлген. Масала, транспорт налогну жыйылывундан ва муниципал ёл фонддан таба 58 миллион 200 минг манатны къадарында ремонт ишлер этилинген.

Районну ичиндеги гьар юртда этилмеге ва оьтгерилмеге гёз алгъа тутулгъан ишлени ва муратланы яшавгъа чыгъармакъ учун транспорт налог булан янаша топуракъ, мюлк ва оьзге налогланы ва тёлевлени оьз болжалына пачалыкъны къуллукъларына тёлемеге тарыкълыгъын адамлагъа унутмагъа тюшмей.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

10