Оператив штаб буюра

Оператив штабны ёлбашчысы, районну гьакимбашы Магьмут Амиралиев оператив штабны уьюрлерине коронавирус гьал гьакъда оьзлени ойларын ва пикруларын айтмагъа таклиф этди.

Инг башлап Роспотребнадзорну Къарабудагъгент район бёлюгюню ёлбашчысы О. Абачараев оьзюню пикруларын айтды. Ол оьзюню сёйлевюнде коронавирус аврувну бизин райондагъы гьалы ва къайсы категориялы адамлар аслу гьалда авругъаны гьакъда тындырыкълы кюйде маълуматлар берди. Олай да, ол районну гьакимбашы М. Амиралиев шу гьалны яхшылашдырмакъ ва ёрукълашдырмакъ учун гьаракат этип айлангъанына баракалла билдирди.

Къарабудагъгент ЦРБ-ни баш врачы Р. Гьиравов коронавирус аврувну гьакъында бугюнге ерли авругъанланы санаву ва олагъа этилген чаралар гьакъда хабарлады. Демек, 367 адам коронавирус аврув булан авругъан, 66-сы – оьлген. Бугюн-буссагьат район больницада 39 адам авруп ятгъан. Шо саялы да, КЦРБ-ни яшланы бёлюгю шолай аврувланы ятдырмакъ учун онгарылгъан. Олай да, уьюнде авруйгъанлагъа больницадан таба гьавайын дарманлар берилежек. Тестлени санаву да гьар гюн 200-ге чыкъмагъа тарыкъ. Къарабудагъгент ЦРБ-ни баш врачы шо гьакъда баянлыкълар берди.

РОВД-ни жаваплы къуллукъчусу Р.Халдузов ватандашлар Роспотребнадзорну талапларын яшавгъа чыгъармайгъанын эсгерди. Демек, олар маскалар ва къолгъаплар гиймей, социал аралыкъны тутмай. Маршруткалагъа минеген, тюкенлеге гиреген адамлар шо талапланы тутмайгъанын ол бирдагъы керен айтды. Шолай адамланы жавапгъа тартмакъ муратда РОВД-ни къуллукъчулары 3600-ден къолай административ протокол язгъанлыгъын аян этди.

Районну билим берив управлениесини, УСЗН-ни, ГО ва ЧС бёлюклерини ёлбашчылары Т.Хизриева, Г.Гьажиева ва А.Османов ёлдашлар да аврув булангъы гьалны гьакъында оьзлени пикруларын айтдылар.

Оператив штабны барышында районну гьакимбашы М. Амиралиев ону гьасилин чыгъарып сёйледи ва оьзюню таклифлерин берди.

Инг башлап, ол аптеклерде дарманланы бар экенлигин, маскаланы ва къолгъапланы гиегенлигин тергемекни тапшурду. Олай да, районну ичиндеги юртларда 8 аптекни белгилемеге ва шоларда бары да тарыкълы дарманланы барлыгъына агьамият бермекни буварды.

Районну башчысы М. Амиралиев больницада койкаланы гьайын этмекни де эсгере туруп, бир гюнню ичинде 200-ден кем болмагъан кюйде тест-тергевлер этмеге чакъырды.

РОВД-ни къуллукъчуларына районну гьакимбашы маскалар гиймейгенлени жавапгъа тартмагъа, олагъа къодулар (штраф) салмакъны таклиф этди. Олай да, М.Амиралиев районну ичиндеги бары да школаларда, къурумларда янгы йылгъа багъышлангъан байрам чараланы гери урмакъны тапшурду.