Меню
16+

Сетевое издание «Будни района»

04.12.2020 08:40 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

«Гече юрюген – гюндюз сююнер»

Автор: Шихав Къайирбеков

Биз къайсыбыз да яш заманларыбызда уллуларыбыздан «Гече юрюген – гюндюз сююнер» яда буса «Бугюн этме болагъан ишни тангалагъа туварма» деген айтывланы кёп керенлер эшитгенбиз. Тек ону маънасына онча агьамият бермей къоя эдик. Гьакъыкъатда ойлашып къарасакъ, айтывланы терен уьйретивчю маънасы бар.

«Гече юрюген – гюндюз сююнер» деген айтыв, балики, тезги транспорт аз заманларда адамлар бир ерден бир ерге яяв юрюп барагъан вакътилерде амалгъа гелген болма ярай.

«Бугюн этме болагъан ишни тангалагъа туварма» деген айтыв бу йыл лап бизин авлакъчыларыбызгъа айтагъандай чалына.

Мен мунда айтма сюеген зат: районубузну авлакъчылары гелеген йылны тюшюмю учун 11664 гектар майданлагъа къылчыкълы гюзлюк ашлыкълар чачма тарыкъ эди. Янгурланы алдында районда 6450 гектаргъа гюзлюклер чачылгъан. Айтма тарыкъ, ерлерде гюзлюклер чачывгъа гьазирлик гёрюв, топуракъланы сюрюв ва оьзге тюрлю агротехника чаралар авур шартларда оьтдю. Чакъ къургъакъ гелип, топуракъ бек къатты эди. Сюрме къыйын, къолдан иш чыкъмай деме ярайгъан гьал тувулунгъанын билебиз. Тек…

Нечик буса да, 11 минг гектардан къолай ерни гюзлюклер чачмакъ учун сюрме бажарылды.

Ерлерде топуракъда дагьни ёкъ деп чачыв ишлер чаналады. Кёбюсю юрт администрацияларда янгур болур деп, чачывну артгъа теберип турдулар. Ноябр айны ахырынчы 10 гюнлюгюнде башлангъан янгурлар гьали де узатылып тура. Синоптиклер билдиреген кюйде, декабр айны 6-сы болгъунча бизин якъларда янгурлар гёрсете. Арты нечик болагъаны, белгисиз авлакъчыларыбыз къалгъан участкалагъа геч буса да гюзлюклер чачма болармы?

Тавакаллыкъ этип топуракъда дагьни болмагъан буса да, ерлерде бар сюрюлген топуракълагъа гюзлюклер чачылып къалгъан буса, нечик яхшы болур эди. Районда гюз чачывну планыны толуву 60 процентге етишмей.

Амма Гьели юртну ватандашлары артдагъы йылларда топуракъланы асувлу къоллавгъа, ишлетивге тергевню гючлендирген. Муна бу йыл гюзде де гелеген йылны тюшюмю учун къылчыкълы гюзлюк ашлыкълар чачывда районну авлакъчыларына уьлгю гьисапда гёрсетме ярай. Гьелили механизаторлар авур шартлагъа да къарамайлы, тавакаллыкъ этип, 2 минг гектаргъа ювукъ майданлагъа гюзлюклер чачгъан. Юртдагъы «Мурат» деген СПК 250 гектаргъа гюзлюклер чачгъан. Айры-айры адамлар да кёп майданлагъа ашлыкълар чачгъанлар. Ижарачы Магьамматсайит Абсаматов кёп майданланы ижарагъа алып ишлете.

Авур шартлагъа да къарамайлы, заманында гёрсетилген планындан артыкъ майданлагъа ашлыкълар чачгъан гьелилилени гьаракатына къарап. «Бугюн этме болагъан ишни тангалагъа туварма» деген айтывну дуруслугъун англама къыйын тюгюл.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

2