«Сыналгъан сырларым»

-Районубузда загьматгъа чы­ныкъгъан, оьзгелеге уьлгю гёрсетип ишлеген, тарихде оьзлени гьызларын къойгъан кёп-кёп жамият чалышывчулар, ёлбашчылар, алимлер, муаллимлер, язывчулар, шаирлер, савунчулар ва башгъа тармакъларда чалышып, белгили болгъан кёп адам бар.

Бизин бугюнгю ёлугъувубуз шолай адамланы бириси Алипаша Умалатовгъа, демек, ону «Сынал­гъан сырларым» деген китабына багъышлангъан,-деп хабарлай ол. Сонг ол жыйылгъанлагъа шо китапны гьакъында хабарлады, оьзюню ойларын айтды.

Алипаша Умалатовну биографиясы булан жыйылгъанланы ону къызыны къызы, юрт музейни ёлбашчысы Ханза Алиева таныш этди.

-Алипаша Жалалович Умалатов Къарабудагъгент районну Къарабудагъгент юртунда сабанчыны агьлюсюнде тувгъан.

Загьмат ёлун ол 1943-нчю йылда райзем бёлюкню секретарыны къуллугъунда башлагъан. 1947-нчи йылда ол КПСС-ни уьюрю болгъан.

1949-нчу йылда ол область партия школаны къызыл диплом булан битдирген сонг, райком сельхоз ва къурум бёлюклерини заведующийи, районну прокурору болуп ишлеген. Ол компартия оьзюню къайда бакъдырса, шонда барып намуслу кюйде ишлеп тургъан. Сонг А.Умалатов ДАССР-ни Министрлер Советини председатели болуп 11 йыл ишлеген. 1978-нчи йылдан 1987-нчи йыл болгъунча ДАССР-ни Оьр Советини Президиумуну Председатели болуп чалышгъан... Ол ватаны, Дагъыстан учун, кёп гёрмекли ишлер этген, демек, ону чалышыву ва гьаракаты савлай девюрню къуршай деме ярай,-дей Х.Алиева.

Сонг А.Умалатовну ол «Сыналгъан сырларым» деген китабыны гьакъында оьзюню пикруларын айтды.

А.Умалатовну гьакъында хабарлай туруп, ону ювукъ танышы, районну тамазаларыны советини председатели Абдулгьамит Мамагишиев, ол юртну халкъы учун этген яхшы ишлерин эсге алды. А.Умалатовну элине бакъгъан сюювю, ону китаплары гьакъда къызардашыны къызы Зугьра Шихаева эсгерди.

Сёз берилген Къарабудагъгент гимназияны 7-нчи класыны охувчусу Ф.Къазакъмурзаева, Къарабудагъгент 1 ва 3 номерли орта школаланы охувчулары Къарабудагъгентге, Дагъыстангъа, Россиягъа багъышлангъан шиъруланы гёнгюнден охуду.

Ёлугъувну тамамлай туруп, А.Ума­латовну къызы Айгьанат Алиева чараны ортакъчыларына баракалла билдирди ва кёп яхшы­лыкълар ёрады.