Cпорт-масса ишлер яхшылаша
Артдагъы бир нече йылланы ичинде бизин районда спорт-масса ишлеге айрыча тергев берилмеге башлангъан. Айтагъаным, районну юртларында яшёрюмлер учун ДЮСШ-лер, хас спорт майданчалар, бары да онгайлыкълары булангъы спорт ясандырывлар булан толумлашгъан спортзалланы санаву йылдан-йылгъа артып юрюй. Шоларда юзлер булангъы юртлу яшлар спортну оьзлер сюйген къайдалары булан машгъул болуп, савлугъун камиллешдирип юрюйлер. Шо яшёрюмлени кёплери орамларда тувулунагъан башалман юрюшлерден айрылып, савлугъун да беклешдирип, спортну тюрлю-тюрлю къайдаларындан ал сыдралагъа чыгъып юрюйгенлери де аз тюгюл. Муна, шу гетип барагъан 2020-нчы йылны ичинде районну спортчулары етишген уьстюнлюклени гьакъында хабарлай туруп, районда спорт ишлеге къарайгъан комитетни ёлбашчысы Завур Умаракъаев бизге берген баянлыкъны тюпде биз охувчуланы тергевюне беребиз.
Гертилей де, артдагъы йылланы ичинде районну спортчуларына айрыча тергев берилме башлангъаны гьис этилине. Шо ишде районну башчысы Магьмут Амиралиевни де гьай этивю, гьаракаты гёрмекли ерни тута.
Айтагъаным, спортчу яшёрюмлер учун къурулагъан спортзалланы, спорт майданчаланы, спортзалланы толумлашдырмакъ учунгъу спорт инвентарланы санаву йылдан-йылгъа артып юрюй. Масала, буссагьатгъы вакътиде районну юртларында 10 ДЮСШ ишлей. Шолардагъы гьар тюрлю спорт секциялагъа 3500-ге ювукъ яшёрюмлер къуршалып, савлугъун камиллешдире туруп, гележекде Ватанына пайдалы уланлар болмакъны гьайын этелер. Оьрде эсгерилген ДЮСШ-лерде 122 тренер-тарбиялавчулар загьмат тёгелер. Оланы аслам пайы – оьр хас билими булангъы тренерлер. Шо саялы болмагъа да ярай, ДЮСШ-леге юрюйген спортчу яшёрюмлерибизни арасындан бажарывлуларыны санаву гьар йыл сайын артып тербей. Ондан къайры да, биздеги ДЮСШ-лени залларындагъы спорт-инвентарлар йылдан-йылгъа янгыртылып юрюй. Бары да онгайлыкълары булангъы, хас спорт майданчаланы санавуда айдан-айгъа, йылдан-йылгъа артып, янгыртылып тура. ДЮСШ-лени материал-техника базасында гьар йыл сайын беклеше ва яхшылаша. Масала, бу йылны ичинде «Спорт яшавну нормасы» деген федерал программагъа гёре, Къарабудагъгент, Паравул, Гьели юртлардагъы ДЮСШ-леге (спорт варкаутлар) тапшурулду. «Местные инициативы» деген милли программагъа гёре бу йыл Къарабудагъгент, Паравул, Гьели, Къакъашура юртларда мини футбол майданчалар къурулуп, юртлу яшёрюмлени ихтиярларына берилди. Бугюнлерде де ерлердеги ДЮСШ-лени залларындагъы ябушув халилерин, халчаларын ва оьзге тюрлю эсгиленген спорт инвентарларын янгыртыв ишлер районда токътавсуз юрюлюп тура. Физкультура ва спорт ишлеге къарайгъан бёлюкню сиптечилиги булан, ДЮСШ-лерде иш гёреген тренерлери, оьзлер ябушувланы къайдаларына уьйретип юрюйген спортчулары да булан ерлерде юрюлеген тюрлю ярышларына да чакъда-чакъда йибериле. Шолай ярышларда ортакъчылыкъ этип, алдынлы ерлеге ес болуп гелеген спортчуларыбызны санаву да йылдан- йылгъа артып юрюй. Масала, бу йылны ичинде 1044 спортчубуз гьар тюрлю ярышларда ортакъчылыкъ этген. Шолардан 355-си оьзлер ортакъчылыкъ этген ярышларда алдынлы ерлени къазанма бажаргъанлар. Алдынлы ерлени алгъанланы арасындан: 65 спортчубуз 1-нчи, 65-си 2-нчи, 111-си буса 3-нчю ерлеге ес болгъанлар. Оьрде эсгерилген спортчуларыбызны арасындан республика ярышларда ортакъчылыкъ этгенлени 14-сю 1-нчи, 14-сю де 2-нчи, 12-си буса 3-нчю ерлени къазангъанлар. Бютюнроссия ярышда ортакъчылыкъ этгенлени арасындан 17 спортчубуз 1-нчи, 10-су буса 2-нчи ерлени, 2 спортчубуз буса 3-нчю ерлени алып къайтгъанлар. Халкъара ярышда ортакъчылыкъ этгенлени арасындан 2-си 1-нчи ерлеге, 1-иси 2-нчи ерни, 10 спортчубуз буса 3-нчю ерлеге ес болгъанлар.
Дагъыстанда биринчилик учунгъу ва чемпионатында ортакъчылыкъ этгенлени арасындан 5 спортчубуз 1-нчи, 4 спортчубуз 2-нчи, 6 спортчубуз буса 3-нчю ерлени къазангъанлар. СКФО-да биринчилик учун юрюлген ярышларында ва чемпионатда 11 спортчубуз 1-нчи ерлени къазанма бажардылар.
Россияда биринчилик учунгъу ва чемпионатында ортакъчылыкъ этгенлени арасындан 2-си 1-нчи, 2-си 2-нчи, 1-иси буса 3-нчю ерлени алдылар.
Бир спортчубуз буса Европаны чемпиону да болду. Гьасиллерибизге гёре, биз бу гетип барагъан 2020-нчы йылыбызны оьрлюклер булан узатажакъбыз. Къолда этилген уьстюнлюклени эсгере туруп, гьали-гьалилерде Оренбург шагьарда боксдан оьтгерилген Россияны чемпионатында бизин районну Дёргели юртлусу Шарапутдин Атаев оьзюню 81 кило авурлугъунда ортакъчылыкъ этип 2-нчи ерни къазанып, районну спорт хазнасына уллу къошумун этди. Йыл боюнда шолай къошумун этегенлер бизде кёп бар. Оланы барысыны да атларын эсгермеге имканлыгъыбыз ёгъуна гёре, биз этилинген аслу ишлени ва ювукъда этилинме гёз алгъа тутулгъанларыны гьакъында эсгеривлер булан тамамланабыз,-дей Завур Умаракъаев. Гертилей де, спорт ишлени яхшылашдыра туруп, районда хыйлы ишлер этилингени ва буссагьатда да этилинип турагъаны биревге де яшыртгъын тюгюл.
Шо саялы болмагъа да ярай, бажарывлу ва алдынлы спортчуларыбызны санаву йылдан-йылгъа артып юрюйгени. Оьрде эсгерилген ишлени яшавгъа чыгъарывда районну башчысы Магьмут Амиралиевни де аслам пайы барын унутмагъа тюшмей.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
