Аты даимлешдирилди

Шоллукъда, декабр айны 22-нде Къарабудагъгент районну ва район больницаны тарихине язылажакъ шатлы агьвалат болду деп айтмагъа ярай. Демек, ДР-ни Гьукуматыны хас къарарына гёре Къарабудагъгент район больницагъа белгили доктор, академик ва профессор Сагьадулла Абдуллатипович Абусуевни аты къоюлду ва даимлешдирилди.

Оьтгерилген шо шатлы чарада Къарабудагъгент ЦРБ-ни бары да медицина къуллукъчулары, Къарабудагъгент район администрацияны жаваплы къуллукъчулары, Гьели юртну вакиллери, Сагьадулла Абусуевни яшлары, дос-къардашы ва къурдашлары оьзлени ортакъчылыгъын болдурдулар.

Къарабудагъгент район больницагъа белгили доктор, академик ва профессор Сагьадулла Абусуевни аты къоюлмакъ учун оьтгерилген чарада ДР-ни савлукъ сакълав министрини орунбасары Райиса Шахсинова, Къарабудагъгент район администрацияны башчысыны орунбасары Жалалутдин Жамалутдинов, Къарабудагъгент район больницаны баш врачы Расул Гьиравов, экология институну директору Магьамматрасул Атаев, юстицияны генерал-лейтенанты, юридический илмуланы доктору Тажутдин Бижамов ва шаир, Росияны язывчуларын союзуну уьюрю Зулейха Атагишиева сёйледилер.

Олар оьзлени сёйлевлеринде бизин оьктемлигибиз Сагьадулла Абусуевни гьакъында лайыкълы сёзлер айтдылар. Демек, Сагьадулла Абусуев оьзюню яшав ва загьмат ёлунда халкъгъа не якъдан да кёмегин болдургъан. Ол эндокринология аврувланы ва тармакъны савлай Дагъыстанда оьсювюне кёп къошумун болдургъан.

Оьтгерилген чараны ахырында Къарабудагъгент район больницаны къапусуна салынгъан Сагьадулла Абусуевни аты къоюлагъан белгини ачмагъа ихтияр ДР-ни савлукъ сакълав министрини орунбасары Райиса Шахсиновагъа ва Сагьадулла Абусуевни къызы Айида Абусуевагъа тапшурулду.

Чараны ахырында ачылгъан эсделикге жанлы гюллер салынды ва Гьели орта школаны охувчулары Сагьадулла Абусуевни шиъруларын гёнгюнден охуду.