Президентни гезикли прес-конференциясы

Шо четимликлени гёз алгъа тутуп, бу йыл оьтгерилген прес-конференцияны барышында алмашынывлар болду. Демек, тыш уьлкелени ва федерал масса маълумат къуралланы журналистлери халкъара сатыв-алыв центрда, регионланы журналистлери буса бир ерге жыйылып, шондан таба Президентге оьзлени соравларын бердилер. Прес-конференцияда 700-ден къолай журналист ва масса маълумат къуралланы вакиллери ортакъчылыкъ этдилер.

Прес-конференцияны РФ-ни Презиндетини прес-секретары Дмитрий Песков ачды ва юрютдю. Гьаманда йимик, ол журналистлеге соравларын бермеге таклиф этген сонг, олар РФ-ни ёлбашчысына оьзлени суалларын бердилер ва жаваплар алдылар. Бу йыл прес-конференцияны ишине, демек, соравланы къабул этмеге волонтерлар да къуршалды ва оьзлени кёмегин болдурдулар.

Коронавирус аврув себепли болуп, журналистлер булан янаша РФ-ни ватандашлары да тувра берилишде оьзлени соравларына жаваплар алдылар.

Алданокъ билдирилген кюйде, ватандашланы, хас къошумлукъ (приложение) къоллап, гьукуматны ёлбашчысына оьзлени соравларын бермеге имканлыгъы болду.

Озокъда, прес-конференцияны барышында аслу гьалда янгы яйылгъан коронавирус аврувну гьакъында кёп санавда суаллар берилди. Олай да, журналистлени ва ватандашланы уьлкеде социал-экономика, савлукъ сакълав, билим берив, маданият, адабият, айлана якъны ва табиатны къоруп сакълав, хас милли проектлени яшавгъа чыгъарылыву, Ватанны ва халкъны аманлыгъы ва дагъы да кёп санавдагъы оьзге масъалалагъа байлавлу соравлары чараны юрюшюнде аслу ерни тутду деп айтмагъа ярай.

Гьар ерден сёйлеген ва тувра берилишге чыкъгъан ватандашлар айлыкъ алапаланы, пенсияланы, социал тёлевлени, оьзге тюрлю енгилликлени гьакъындагъы масъалаланы Президентни алдында гётерди.

РФ-ни Президенти Владимир Путин оьзюню сёйлевюню аввалында Россияны экономикасына, ватандашланы яшавуна коронавирус оьте­сиз четимликлер тувдургъанын ва таъсир этгенин аян этди. Олай. да ол ВВП 3,6 процентге тюшгенин айта туруп, шо США ва Европа булан тенглеширгенде, бек осал тюгюл экенлигин ачыкъ этди.

Прес-конференцияны вакътисинде В. Путин гьар тюрлю масъаланы гьакъында мекенли кюйде эсгерди. Масала, россиялыланы 13,5 проценти осал яшайгъанын, коронавирус аврув булан ябушагъан докторлагъа ва оьзге къуллукъчулагъа гётеринки даражада алапалар берилгенин, шо аврувгъа къаршы вакцина Россияда биринчилей этилгенин, 2021-нчи йылда РФ-ни Пачалыкъ Думасына болажакъ сайлавланы, йылны ахырында лап да тарыкълы ашамлыкъ продукталаны багьалары артгъанын, шо багьаланы артывун токътатмакъ муратда гёрюлеген чараланы, муаллимлени алапаларыны гьакъында баянлыкълар берди.

Олай да, чараны барышында журналистлер ва ватандашлар РФ-ни Презиндентине тыш уьлкелер булангъы аралыкъланы, бютюн дюньяны экономикасы, США-да оьтгерилген сайлавланы гьакъындагъы суаллар бердилер ва шолагъа жаваплар алдылар.

– Прес-конференцияны барышында телефонлардан ва электрон почдан гелген соравлар бири де жавапсыз къалмажакъ,-деп билдире ОНФ. Демек, шо соравлар топланып ва жыйылып РФ-ни Президентини администрациясына ва РФ-ни Гьукуматына йиберилежек.