Меню
16+

Сетевое издание «Будни района»

18.12.2020 08:30 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Эл учун этилген къуллукъ унутулмас

Автор: Багьавутдин Самадов

Бу йыл бизин элибиз Уллу Уьстюнлюкню 75 йыллыкъ юбилейин белгилей. Олай да, районубуз къурулгъанлы 85 йыл тамамланды.Гьар-бир тюрлю себеплеге гёре, байрам чараланы генг кюйде оьтгермеге бажарылмаса да, давда ва загьматда чыныкъгъан ва уьлгю гёрсетген уланларыбызны, къызларыбызны гьакъында гьаманда айтмагъа ва язмагъа борчлубуз. Бу макъалада къакъашуралы Гьюсейин Агьматовну гьакъында айтылажакъ. Маълуматлар Къакъашура юрт музейни ёлбашчысы Айханым Насрутдиновадан алынгъан.

Гьюсейин Агьматов 1915-нчи йылда Къакъашура юртда тувгъан.

Давну гьакъында сёз чыкъса, къакъашуралы Гьюсейин Агьматовну гёз алдына йыракъдагъы Кандалакша шагьар гелип токътай. Шо шагьар ону тюшюнде де кёп гёрюнген. Шогъар тамаша болмагъа да кюй ёкъ. Неге тюгюл де, Гьюсейин агъав немис-фашистлер булангъы къанлы ябушувларда Ватаныбызны Темиркъазыкъ боюнда Мурманск областны Кандалакша шагьарны ягъаларында фронт тутуп токътагъан болгъан. Ол – шонда юрюлген гючлю ябушувланы жанлы ортакъчысы ва шагьаты.

Гьюсейин Агьматов, оьзюню тенг­лилери йимик, асгерге чакъырылгъынча, ата юрту Къакъашурада колхозда ишлей. 1940- нчы йылны 22 -нчи июнунда, демек, Германия булан дав башлангъынча бир йыл алда асгерге чакъырыла. Ол Кандалакша шагьарда ерлешген 273-нчю атышывчу полкну 2-нчи батальонуну пулемёт ротасында къуллукъ этме башлай.1941-нчи йыл Германия, Финляндияны да оьзюню янына тартып, бирикген гючлери булан Карелиягъа гире.

«Бизин полкубуз душмангъа къаршы ябушма башлады. Карелия фронтунда мен 3 керен яраландым. Давгъа тюшюп, 20-нчы гюн биз душманны къамавуна тюшюп къалдыкъ. Лап уьзюрюге сакъланагъан жумалыкъ ашамлыгъыбыз да битди. Мени бутума яра тийди. Гючлю ябушувланы натижасында, батмакълыкълагъа батыла туруп, къамавдан чыкъмагъа бажарылды. Ай ярым госпитальда ятып, сонг къайтып полкума гелдим», — деп хабарлай болгъан Гьюсейин оьзюню юртлуларына.

Гьюсейин ва ону ёлдашлары экинчилей де къамавгъа тюше. Душманны гючю кёп. Совет солдатлар авур тас этивлени башдан гечире. Олар ачлыкъгъа тарый. Оьзюню ёлдашлары булан бирче Гьюсейин оьлген атны чий этин ашама борчлу бола. Бу гезик де Гьюсейин эсен-аман къамавдан чыгъа. Солдатлар совет асгерге расланып къала. Янгыдан гючлю ябушувлар башлана. Душмангъа гючлю къапас урула.

Шолай ябушувланы бирисинде Гьюсейинни башына яра тие. Шо 1943-нчю йылны сентябр айында бола. Яралангъан Гьюсейин Агьматовну Кандалакша госпитальгъа йиберелер. Ол шонда 2 ай ята. Сонг Архангельскдеги, Тюмендеги госпиталларда къолай бола. Тек огъар дагъы давгъа барма бажарылмай. Ону давну сакъаты деп токъташдыралар.

Гьюсейин Агьматов ата юртуна давну сакъаты болуп къайта. Тек уьйде парахат турмагъа болмай. Колхозда иш башлай. 1944-нчю йылдан 1977-нчи йыллар болгъунча колхозда бригадир болуп ишлей.

Гьюсейинни иши юртлуларына белгили. Оьзюню къайратлы загьматы булан ол Ватанны оьр савгъатларына лайыкълы болгъан. Ону тёшюн Ватан давну бир даражалы ордени, Ленин ва загьмат Къызыл Байракъ орденлер, бир нече ябушувчу ва загьмат медаллар безей. Гьюсейин Агьматов кёп гьюрметли грамоталар булан да савгъатлангъан.

Гьюсейин учун лап уллу савгъат – юртлуларыны гьюрмети. Къакъашуралылар ону яхшы таный. Гьюсейин Агьматовну 8 де авлети бу гюнлерде яшавда гьариси оьз ерин табып, загьмат тёге. 2004-нчю йылда Гьюсейин агъав бириси дюньягъа гёчдю.

Ана ватанын гьакъ юрекден сюегенин Гьюсейин Агьматов ону душмандан якълап ва олай да уьлгюлю загьмат тёгюп исбат этген. Шолай адамлар – бизин учун даимлик уьлгюлер ва яшавубубзну шавлалайгъан юлдузлар.

Бизин районубузда загьматда чыныкъгъан, уьлгю гёрсетген дагъы да кёп санавда белгили уланларыбыз ва къызларыбыз бар. Олар булан бизин районну халкъы гьар даим де оьктем бола.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3